പാലക്കാട്: കേരളത്തില്‍ നിലനില്‍പ്പിനായി പരസ്പരം പോരാടുന്ന കോണ്‍ഗ്രസ്സും സി.പി.എമ്മും പാലക്കാട്ടുനിന്ന് വാളയാര്‍ ചെക്ക് പേസ്റ്റ് കടന്നാല്‍ ഒരുമുന്നണിയില്‍. ഡി.എം.കെ പ്രസിഡന്റ് എം.കെ സ്റ്റാലിന്റെ നേതൃത്വത്തില്‍ രൂപപ്പെട്ട മതേതര പുരോഗമന മുന്നണിയിലെ കക്ഷികളാണ് കോണ്‍ഗ്രസും സി.പി.എമ്മും മുസ്‌ലിംലീഗും സി.പി.ഐയും. എം.ഡി.എം.കെയും തമിഴ്‌നാട്ടിലെ പ്രാദേശിക കക്ഷികളും ഡി.എം.കെ മുന്നണിയിലുണ്ട്. പ്രചാരണ വാഹനങ്ങള്‍, നോട്ടിസുകള്‍, പോസ്റ്ററുകള്‍ എന്നിവയിലൊക്കെ എം.കെ സ്റ്റാലിന്‍, രാഹുല്‍ ഗാന്ധി, സോണിയാഗാന്ധി, വൈക്കോ, സീതാറാംയെച്ചൂരി തുടങ്ങിയവരുടെ ഫോട്ടോകള്‍വച്ചാണ് പ്രചാരണം നടത്തുന്നത്.
മോദിഭരണത്തിന് അറുതി വരുത്തുക, മതേതര ഇന്ത്യ കെട്ടിപ്പടുക്കുക എന്നീ മുദ്രാവാക്യങ്ങളാണ് അവര്‍ ഉയര്‍ത്തിപ്പിടിക്കുന്നത്. 'നാങ്കള് ഒണ്‍ട്രായ് നിന്‍ട്ര്‌പോരാടുകിറോം' എന്ന് ഒറ്റക്കെട്ടായി പ്രഖ്യാപിക്കുന്നു അവിടെ.
തമിഴ്‌നാട്ടില്‍ മോദി വിരുദ്ധ തരംഗം യാഥാര്‍ഥ്യമാക്കാന്‍ എല്ലാവരും ഒന്നിച്ചു നിന്ന് പ്രവര്‍ത്തിക്കുമെന്നാണ് മുന്നണിയുടെ നേതാക്കള്‍ പറയുന്നത്. മധുരയിലെ സി.പി.എം സ്ഥാനാര്‍ഥിയുടെ പ്രചാരണ ബോര്‍ഡില്‍ രാഹുല്‍, സ്റ്റാലിന്‍ എന്നിവരുടെ ഫോട്ടോ ചേര്‍ത്തത് തമിഴ്‌നാട്ടില്‍ ചര്‍ച്ചപോലും അല്ല. എന്നാല്‍ വാളയാറിന് ഇപ്പുറത്തുമാത്രമാണ് രാഷ്ട്രീയ അയിത്തങ്ങളും തൊട്ടുകൂടായ്മകളും.