കണ്ണൂര്‍: ഡി.എ വര്‍ധനവിനുവേണ്ടി ജില്ലയിലെ സ്വകാര്യ ബസ് ജീവനക്കാര്‍ നാളെ മുതല്‍ പ്രഖ്യാപിച്ച അനിശ്ചിതകാല പണിമുടക്കില്‍ ഇന്നു ഉച്ചയ്ക്കു 2.30ന് ലേബര്‍ ഓഫിസറുടെ സാന്നിധ്യത്തില്‍ ചര്‍ച്ച നടത്തും. നേരത്തെ ഡി.എ വര്‍ധനവ് നല്‍കിയ ഉടമകളുടെ ബസുകളെയും ജില്ലയ്ക്കു പുറത്തു നിന്നും സര്‍വിസ് നടത്തുന്ന ബസുകളെയും പണിമുടക്കില്‍ നിന്ന് ഒഴിവാക്കിയിരുന്നു. 25 ശതമാനത്തോളം ഉടമകള്‍ ഇതിനകം ഡി.എ നല്‍കിയിട്ടുണ്ട്. സമരം പ്രഖ്യാപിച്ചതോടെ പയ്യന്നൂര്‍, തളിപ്പറമ്പ് ഭാഗങ്ങളിലെ കൂടുതല്‍ ഉടമകള്‍ ഡി.എ നല്‍കാന്‍ തയാറായി മുന്നോട്ടു വന്നിട്ടുണ്ട്. ഇന്നു നടക്കുന്ന ചര്‍ച്ചയില്‍ മറ്റു ഉടമകള്‍ പുതുക്കിയ ഡി.എ നല്‍കാന്‍ തയാറായില്ലെങ്കില്‍ സമരവുമായി മുന്നോട്ടു പോകാനാണ് സംയുക്ത സമരസമിതിയുടെ തീരുമാനം.