ചക്കരക്കല്‍: ചെമ്പിലോട് ബി.ജെ.പി ഓഫിസിനും വിവേകാനന്ദ വായനശാലയ്ക്കു നേരെയും ആക്രമണം. വാതിലുകളും ജനലുകളും തകര്‍ത്തു. ചെമ്പിലോട് ഹൈസ്‌കൂളിനു സമീപത്തെ വി സുരേശന്‍ സ്മൃതി മന്ദിരത്തില്‍ പ്രവര്‍ത്തിക്കുന്ന ബി.ജെ.പി ചെമ്പിലോട് പഞ്ചായത്ത് കമ്മിറ്റി ഓഫിസ്, വിവേകാനന്ദ വായനശാല എന്നിവയ്ക്കു നേരേയാണ് ഇന്നലെ പുലര്‍ച്ചെ ഒന്നോടെ ആക്രമണമുണ്ടായത്. വാതില്‍ തകര്‍ത്ത് അകത്തുകയറിയ സംഘം ഫര്‍ണിച്ചറുകള്‍ നശിപ്പിക്കുകയും ടൈല്‍സ് പാകിയ തറ കല്ലുകൊണ്ട് ഇടിച്ചുതകര്‍ക്കുകയും ചെയ്തു. വായനശാലയിലെ പുസ്തകങ്ങളും നശിപ്പിച്ചു. അക്രമത്തില്‍ ആറു ജനലുകള്‍ തകര്‍ന്നു. ബൈക്കിലെത്തിയ സംഘമാണ് ആക്രമണം നടത്തിയത്. ചക്കരക്കല്‍ പൊലിസ് സ്ഥലത്തെത്തി അന്വേഷണം നടത്തി. ആക്രമണത്തില്‍ പ്രതിഷേധിച്ച് തലവിലില്‍ ബി.ജെ.        പി പ്രതിഷേധപ്രകടനം നടത്തി.