ഉള്ള്യേരി: പഞ്ചായത്ത് ലൈഫ് പദ്ധതിയിലെ ഗുണഭോക്തൃ പട്ടികയില്‍ ഉള്‍പ്പെട്ടിട്ടും റേഷന്‍ കാര്‍ഡില്ലെന്ന കാരണത്താല്‍ നടപടികള്‍ തടസപ്പെട്ടതിനെ തുടര്‍ന്ന് നാലംഗ കുടുംബം നടത്തിയ കുത്തിയിരിപ്പ് സമരം ജില്ലാ കലക്ടര്‍ യു.വി ജോസ് നല്‍കിയ ഉറപ്പിന്‍മേല്‍ അവസാനിപ്പിച്ചു. ആയിരോളി മീത്തല്‍ ഗിരീശനും ഭാര്യ സുധയും മക്കളായ ആര്യയും അഞ്ജലിയും രണ്ട് ദിവസമായി പഞ്ചായത്ത് കവാടത്തില്‍ നടത്തിയ കുത്തിയിരിപ്പ് സമരമാണ് ഇന്നലെ വൈകിട്ടോടെ അവസാനിപ്പിച്ചത്.
റേഷന്‍കാര്‍ഡ് ലഭ്യമാക്കാന്‍ ഉടന്‍ നടപടി സ്വീകരിക്കുമെന്ന ധാരണയിലാണ് കുടുംബം സമരം അവസാനിപ്പിച്ചത്. കാര്‍ഡ് ലഭിക്കുന്ന മുറക്ക് ലൈഫ് പദ്ധതിയുടെ തുടര്‍നടപടി സ്വീകരിക്കുമെന്നാണ് കലക്ടര്‍ കുടുംബത്തെ അറിയിച്ചു.
ലൈഫ് മിഷന്‍ ജില്ലാ കോര്‍ഡിനേറ്റര്‍ ജോര്‍ജ്, പഞ്ചായത്ത് മെംബര്‍ എം.സി അനീഷ്, സതീഷ് കന്നൂര്, സുധീര്‍ പട്ടാങ്കോട്ട്, ഷമീര്‍ നളന്ദ, തൈവെച്ച പറമ്പില്‍ ബാബു എന്നിവര്‍ ചര്‍ച്ചയില്‍ പങ്കെടുത്തു.