കോട്ടയം: ലോക്‌സഭാ തെരഞ്ഞെടുപ്പിനുള്ള സ്ഥാനാര്‍ഥികളുടെ നാമനിര്‍ദേശപത്രിക സമര്‍പ്പണം ഇന്ന് ആരംഭിക്കും. തെരഞ്ഞെടുപ്പ് സ്വതന്ത്രവും സുഗമവുമായി നടത്തുന്നതിനുള്ള ഒരുക്കങ്ങള്‍ കോട്ടയം ജില്ലയില്‍ ഊര്‍ജിതമായി പുരോഗമിക്കുകയാണെന്ന് ജില്ലാ വരണാധികാരി കൂടിയായ കലക്ടര്‍ പി.കെ സുധീര്‍ ബാബു വാര്‍ത്താസമ്മേളനത്തില്‍ അറിയിച്ചു.തെരഞ്ഞെടുപ്പ് സ്വതന്ത്രവും സുഗമവുമായി നടത്തുന്നതിനുള്ള ഒരുക്കങ്ങള്‍ ആണ് കോട്ടയം ജില്ലയില്‍ പുരോഗമിച്ചു വരുന്നത്. ഇലക്ട്രോണിക് വോട്ടിങ് മെഷിനുകളുടെ ആദ്യഘട്ട പരിശോധനകള്‍ പൂര്‍ത്തിയാക്കി നാളെ അതിരമ്പുഴ സെന്റ് അലോഷ്യസ് സ്‌കൂളില്‍ വച്ച് അസിസ്റ്റന്റ് റിട്ടേണിങ് ഓഫിസര്‍മാര്‍ക്ക് കൈമാറും. വോട്ടിംഗ് യന്ത്രങ്ങളുടെ രണ്ടാംഘട്ട റാന്‍ഡമൈസേഷന്‍ ഏപ്രില്‍ 10ന് കലക്ടറേറ്റിലെ നാഷണല്‍ ഇന്‍ഫര്‍മാറ്റിക് സെന്ററില്‍ നടക്കും.
കമ്മിഷനിങ് ഏപ്രില്‍ 11ന് അതാത് വിതരണ കേന്ദ്രത്തില്‍ നടത്തുമെന്ന് കലക്ടര്‍ പി.കെ സുധീര്‍ബാബു പറഞ്ഞു പോളിങ് ജോലികള്‍ക്കായി 8140 പേരുടെ സേവനമാണ് ലഭ്യമാക്കിയിട്ടുള്ളത്. ഇവര്‍ക്ക് പരിശീലനം ഏപ്രില്‍ ആദ്യവാരം നടക്കും. രണ്ടാംഘട്ട പരിശീലനം ഏപ്രില്‍ ഏഴു മുതല്‍ 15 വരെ നടക്കും. ഇവയ്ക്കു പുറമേ എല്ലാ പോളിങ് കേന്ദ്രങ്ങളിലും കുടിവെള്ളം, വൈദ്യുതി, ടോയ്‌ലെറ്റ് തുടങ്ങിയ സൗകര്യങ്ങള്‍ ഉറപ്പാക്കുന്നതിനുള്ള ക്രമീകരണവും ഏര്‍പ്പെടുത്തിയിട്ടുണ്ട്. പ്രധാനമായും ഭിന്നശേഷി വിഭാഗത്തില്‍പ്പെട്ട വരെ പോളിങ് പൊലിസ് സ്റ്റേഷനില്‍ എത്തിക്കാനുള്ള പ്രവര്‍ത്തനങ്ങള്‍ നടത്തും. ഭിന്നശേഷിക്കാരുടെ വോട്ടുകള്‍ 100 ഉറപ്പുവരുത്തുകയാണ് ലക്ഷ്യം. ഇവര്‍ക്കായി വാഹനസൗകര്യം അടക്കം ഏര്‍പ്പെടുത്തുമെന്നും കലക്ടര്‍ അറിയിച്ചു
സ്ഥാനാര്‍ഥികളുടെ തെരഞ്ഞെടുപ്പ് ചിലവുകള്‍ അക്കൗണ്ട് ചെയ്യാന്‍ അസിസ്റ്റന്റ് എക്‌സ്‌പെന്‍ഡിച്ചര്‍ ഒബ്‌സര്‍വര്‍മാര്‍, സ്ഥാനാര്‍ത്ഥികളുടെ പൊതുപരിപാടികള്‍ ചിത്രീകരിക്കാന്‍ വീഡിയോ സര്‍വൈലന്‍സ് ടീം, അനധികൃത മദ്യം നിര്‍മാണവും വിതരണവും തടയാന്‍ ലിക്വര്‍ മോണിറ്ററിങ് കമ്മിറ്റി തുടങ്ങി വിവിധ പ്രവര്‍ത്തനങ്ങള്‍ ഏകോപിപ്പിച്ചു നടപ്പിലാക്കി വരികയാണ്.
സ്ഥാനാര്‍ഥികളുടെ പത്രിക സമര്‍പ്പണം വ്യാഴാഴ്ച മുതല്‍ ആരംഭിക്കും. ഏപ്രില്‍ നാലുവരെ പത്രിക സമര്‍പ്പിക്കാവുന്നതാണ്. പത്രികകളുടെ സൂക്ഷ്മ പരിശോധന അഞ്ചിന് നടക്കും.