ഒസ്‌ലോ: വംശവെറിയുടെ പേരില്‍ ചൈനീസ് വംശജയാ അര്‍ധ സഹോദരിയെ കൊലപ്പെടുത്തുകയും ഒസ്‌ലോ പള്ളിയില്‍ വിശ്വാസികള്‍ക്കു നേരെ വെടിയുതിര്‍ക്കുകയും ചെയ്ത യുവാവിനെ 21 വര്‍ഷം തടവിന് ശിക്ഷിച്ച് നോര്‍വീജിയന്‍ കോടതി. നോര്‍വേയിലെ സാന്‍ഡ്വികാ ഡിസ്ട്രിക്റ്റ് കോടതിയാണ് യുവാവിന് ശിക്ഷ വിധിച്ചത്. 

കഴിഞ്ഞ വര്‍ഷം ആഗസ്തിലായിരുന്നു കേസിന്നാസ്പദമായ സംഭവം.  ഒസ്‌ലോയിലെ ബഇറം പ്രാന്തപ്രദേശത്തെത്തിയ 22കാരനായ മാന്‍ഹോസ് എന്ന യുവാവ് അര്‍ധസഹോദരി ഷാങ്ജിയ ഇഹ്‌ലെ ഹാന്‍സെനെ വെടിയുതിര്‍ത്തു കൊലപ്പെടുത്തുകയായിരുന്നു. അര്‍ധ സഹോദരിക്കു നേരെ നാലുതവണ വെടിയുതിര്‍ത്ത പ്രതി അവിടെ നിന്നിറങ്ങി തലസ്ഥാന നഗരിയിലെ അല്‍ നൂര്‍ പള്ളിയിലെത്തി വെടിയുതിര്‍ക്കുകയായിരുന്നു. 

 പെള്ളിയിലെ വെടിവയ്പ്പില്‍ ആര്‍ക്കും ഗുരുതര പരുക്ക് ഏറ്റിരുന്നില്ല.  വംശീയവിദ്വേഷമാണ് പ്രതിയെ കുറ്റകൃത്യത്തിന് പ്രേരിപ്പിച്ചതെന്ന് പൊലിസ് കണ്ടെത്തിയിരുന്നു.  തുടര്‍ന്ന് വംശവെറി, തീവ്രവാദം എന്നീ കുറ്റങ്ങള്‍ ചുമത്തി പൊലിസ് പ്രതിയെ അറസ്റ്റ് ചെയ്യുകയായിരുന്നു. വിചാരണയ്ക്കിടെ കുറ്റം സമ്മതിച്ച പ്രതി കൂടുതല്‍ പേര്‍ക്ക് അപകടം സംഭവിക്കാത്തതില്‍ താന്‍ അതൃപ്തനാണെന്നും വ്യക്തമാക്കിയിരുന്നു.