തിരുന്നാവായ: റോഡരികിലെ പൊന്തക്കാടുകള്‍ കാല്‍നട യാത്രികര്‍ക്ക് ഭീഷണിയാകുന്നു. തിരുന്നാവായ -പുത്തനത്താണി റോഡില്‍ എടക്കുളം അങ്ങാടിയിലേക്ക് പോകുന്ന ഭാഗത്ത് പടര്‍ന്ന് പന്തലിച്ചുനില്‍ക്കുന്ന പൊന്താക്കാടുകള്‍ കാല്‍നട യാത്രക്കാര്‍ക്കാണ് പ്രയാസങ്ങള്‍ സൃഷ്ടിക്കുന്നത്.
റോഡിന്റെ ഇടതുവശത്തോട് ചേര്‍ന്ന് വളരുന്ന പൊന്തക്കാടുകള്‍ കാരണം ചീറിപാഞ്ഞു വരുന്ന വാഹനങ്ങളില്‍നിന്നു രക്ഷ നേടുന്നതിന് കാല്‍നട യാത്രികര്‍ക്ക് റോഡില്‍നിന്നു അകലം പാലിച്ചു നടക്കാന്‍ കഴിയാത്ത അവസ്ഥയാണ്.
ഇത് യാത്രക്കാരുടെ ജീവന് ഭീഷണിയാണ്. എടക്കുളം അങ്ങാടിയിലേക്ക് സ്ത്രീകളും കുട്ടികളടക്കമുള്ള നൂറുകണക്കിന് പേരാണ് കാല്‍നടയായി പോകുന്നത്. സമീപത്തെ സ്‌കൂളുകളിലേക്കും മദ്‌റസകളിലേക്കും നിരവധി വിദ്യാര്‍ഥികള്‍ ഇതിലൂടെയാണ് കടന്നുവരുന്നത്. ഇറക്കവും വളവുമുള്ള ഇവിടെ അപകടസാധ്യത ഏറെയാണ്. അപകടസാധ്യത കണക്കിലെടുത്ത് പൊന്തക്കാടുകളും റോഡിലേക്ക് ഇറങ്ങി നില്‍ക്കുന്ന മരങ്ങളും വെട്ടിമാറ്റാന്‍ അധികൃതര്‍ അടിയന്തിരമായി ഇടപെടണമെന്ന് നാട്ടുകാര്‍ ആവശ്യപ്പെടുന്നു.