വാഷിങ്ടണ്‍: ഉപഗ്രഹ വേധ മിസൈല്‍ പരീക്ഷണത്തിനു പിന്നാലെ ഇന്ത്യക്ക് ബഹിരാകാശ മാലിന്യത്തെ കുറിച്ച് മുന്നറിയിപ്പു നല്‍കി യു.എസ്.

പരീക്ഷണങ്ങള്‍ നടത്തുമ്പോള്‍ ബഹിരാകാശ മാലിന്യങ്ങളെ കുറിച്ചു രാജ്യങ്ങള്‍ ബോധവാന്‍മാരായിരിക്കണമെന്ന് യു.എസ് ആക്ടിങ് പ്രതിരോധ സെക്രട്ടറി പാട്രിക് ഷനാഹന്‍ പറഞ്ഞു. ഇന്ത്യയുടെ ഉപഗ്രഹവേധ മിസൈല്‍ പരീക്ഷണത്തിന്റെ അനന്തര ഫലങ്ങള്‍ സംബന്ധിച്ച് യു.എസ് പഠിച്ചുകൊണ്ടിരിക്കുകയാണെന്നും പാട്രിക് പറഞ്ഞു.

അതേസമയം, മിഷന്‍ ശക്തി പരീക്ഷണം മൂലം ബഹിരാകാശ മാലിന്യ ഉണ്ടാകുമെന്ന സാധ്യതയെ വിദേശകാര്യ മന്ത്രാലയം തള്ളിക്കളഞ്ഞു. അന്തരീക്ഷത്തിലെ താഴ്ന്ന ഓര്‍ബിറ്റിലാണ് പരീക്ഷണം നടത്തിയത്. എല്ലാ മാലിന്യങ്ങളും പൂര്‍ണമായും നശിച്ച് ആഴ്ചകള്‍ക്കുള്ളില്‍ ഭൂമിയിലേക്ക് പതിക്കുമെന്നും വിദേശകാര്യ മന്ത്രാലയം വ്യക്തമാക്കി.