പെരിക്കല്ലൂര്‍: അവധിക്കാലമായതോടെ കൊളവള്ളിയിലെ കബനിപുഴയോരത്ത് അവധിക്കാലം ആഘോഷിക്കാന്‍ എത്തുന്നവരുടെ വന്‍തിരക്ക്. ബന്ദിപ്പൂര്‍ നാഗര്‍ഹോള വനമേഖലയോട് ചേര്‍ന്ന് കന്നാരംപുഴ കബനി നദിയില്‍ സംഗമിക്കുന്ന പുഴയോരത്താണ് വന്യമൃഗങ്ങള്‍ രാപകലില്ലാതെ തീറ്റയും വെള്ളവും തേടിയെത്തുന്നത്.
ഇതാണ് സഞ്ചാരികള്‍ ഈ മേഖലയിലേക്ക് എത്താന്‍ കാരണം. കബനി നദിയില്‍ ജലവിതാനം താഴ്ന്നതോടെ നീന്തിക്കുളിക്കുന്നതിനും ഇവിടെ സൗകര്യമുണ്ട്. വനം വകുപ്പിന്റെ കീഴിലുള്ള 20 ഏക്കറോളം ഉള്‍ക്കൊള്ളുന്ന പുല്‍മൈതാനവും സഞ്ചാരികളെ ഇവിടേക്ക് ആകര്‍ഷിക്കാന്‍ കാരണമാകുന്നു. വേനല്‍ മഴ പെയ്തതോടെ കര്‍ണാടക വനമേഖലയില്‍ പച്ചപ്പ് നിറഞ്ഞതും വനസൗന്ദര്യം നുകരാന്‍ സഞ്ചാരികള്‍ക്ക് കഴിയുന്നുണ്ട്.
വൈകിട്ട് മൂന്നു മുതലാണ് സഞ്ചാരികളുടെ വന്‍തിരക്ക്. ജില്ലയിലെ മറ്റ് ടൂറിസ്റ്റ് കേന്ദ്രങ്ങളിലെല്ലാം പ്രവേശനം പാസ് മൂലമാണെങ്കിലും ഇവിടെ യാതൊരു നിയന്ത്രണവുമില്ലാത്തതാണ് സഞ്ചാരികളുടെ ഒഴുക്ക് വര്‍ധിക്കാന്‍ കാരണം.