ചെറുപുഴ: നിര്‍മാണത്തിലിരിക്കുന്ന പെരിങ്ങോം ഗവ. കോളജ് കെട്ടിടത്തിലും ഐ.ടി.ഐ കെട്ടിടത്തിലും പ്ലംബിങ് ഉപകരണങ്ങള്‍ മോഷണം പോയി. ഇന്നലെ രാത്രിയാണ് മോഷണം ശ്രദ്ധയില്‍പെട്ടത്. പുതിയ കെട്ടിടത്തില്‍ സ്ഥാപിച്ച വാഷ് ബേസിന്റെ സ്റ്റീല്‍ ടാപ്പുകളാണ് മോഷ്ടിക്കപ്പെട്ടത്. മുപ്പതോളം ടാപ്പുകള്‍ ഊരിയെടുത്ത നിലയിലാണ്. ചില വാതിലുകള്‍ തകര്‍ത്ത നിലയിലും കാണപ്പെട്ടിട്ടുണ്ട്. പുതുതായി നിര്‍മിക്കുന്ന ഐ.ടി.ഐയിലെയും പ്ലംബിങ് സാധനങ്ങള്‍ മോഷ്ടിക്കുകയും വാഷ് ബേസിനും മറ്റും നശിപ്പിക്കുകയും ചെയ്തിട്ടുണ്ട്.
സ്റ്റീല്‍ ടാപ്പുകള്‍ ഊരിയെടുത്ത ശേഷം പൈപ്പുകളും മറ്റും ഉപേക്ഷിച്ച നിലയിലുമാണ്. പെരിങ്ങോം എസ്.ഐ എം. സജിത്ത് സ്ഥലം സന്ദര്‍ശിച്ച് കേസെടുത്തു. കണ്ണൂരില്‍നിന്ന് വിരലടയാള വിദഗ്ധര്‍ സ്ഥലത്തെത്തി.