മലപ്പുറം: സുന്നി മഹല്ല് ഫെഡറേഷന്‍ സംസ്ഥാന കമ്മിറ്റി ഏപ്രില്‍ 26, 27 തിയതികളില്‍ തൃശൂര്‍ ദേശമംഗലം മലബാര്‍ എന്‍ജിനീയറിങ് കോളജില്‍ നടത്തുന്ന ദേശീയ പ്രതിനിധി സംഗമത്തിന് അന്തിമ രൂപം നല്‍കി. മലപ്പുറം സുന്നി മഹലില്‍ ചേര്‍ന്ന സ്വാഗതസംഘം യോഗത്തിലാണ് അന്തിമ രൂപമായത്. 26ന് ഉച്ചയ്ക്ക് രണ്ടിന് രജിസ്‌ട്രേഷന്‍ ആരംഭിക്കും. വൈകിട്ട് നാലിന് എസ്.എം.എഫ് തൃശൂര്‍ ജില്ലാ പ്രസിഡന്റ് ചെറുവാളൂര്‍ ഹൈദ്രൂസ് മുസ്്‌ലിയാര്‍ പതാക ഉയര്‍ത്തുന്നതോടെ ക്യാംപിന് ഔപചാരിക തുടക്കമാവും. സംഗമം മുഫ്തി ശരീഫു റഹ്്മാന്‍ രിസ്‌വി ബിഹാര്‍ ഉദ്ഘാടനം ചെയ്യും. പാണക്കാട് സയ്യിദ് ഹൈദരലി ശിഹാബ് തങ്ങള്‍ അധ്യക്ഷനാകും. സ്വാദിഖലി ശിഹാബ് തങ്ങള്‍, അബ്ബാസ് അലി ശിഹാബ് തങ്ങള്‍, പ്രൊഫ. കെ. ആലിക്കുട്ടി മുസ്്‌ലിയാര്‍, എം.ടി അബ്ദുല്ല മുസ്്‌ലിയാര്‍ പങ്കെടുക്കും.
രാത്രി ഏഴിന് മഹല്ല് നവ ലോകത്തെ സംസ്‌കരണ മാതൃകകളില്‍ ഡോ. സാലിം ഫൈസി കൊളത്തൂര്‍, അബ്ദുസ്സലാം ഫൈസി ഒളവട്ടൂര്‍ എന്നിവര്‍ വിഷയാവതരണം നടത്തും. 27ന് രാവിലെ 7.30 ന് നടക്കുന്ന ചര്‍ച്ചാ വേദിയില്‍ ഡോ. ബഹാഉദ്ദീന്‍ മുഹമ്മദ് നദ്‌വി, പിണങ്ങോട് അബൂബക്കര്‍, അഹമ്മദ് വാഫി കക്കാട്, മഅ്മൂന്‍ ഹുദവി വണ്ടൂര്‍, ളിയാഉദ്ദീന്‍ ഫൈസി മേല്‍മുറി നേതൃത്വം നല്‍കും. തുടര്‍ന്ന് നടക്കുന്ന 'വ്യക്തിത്വം നേതൃത്വം' എന്ന സെഷനില്‍ ശറഫുദ്ദീന്‍ ഹുദവി ആനമങ്ങാടും സാമൂഹിക വിചാരം സെഷനില്‍ എസ്.വി മുഹമ്മദലിയും കര്‍മപഥം സെഷനില്‍ അബ്ദുസ്സമദ് പൂക്കോട്ടൂരും വിദ്യാഭ്യാസ സെഷനില്‍ പി.സി ജാഫര്‍ ഐ.എ.എസും വിഷയാവതരണം നടത്തും.
നാലിന് നടക്കുന്ന സമാപന സംഗമത്തില്‍ സമസ്ത പ്രസിഡന്റ് സയ്യിദ് ജിഫ്‌രി മുത്തുക്കോയ തങ്ങള്‍ അധ്യക്ഷനാകും. സയ്യിദ് ഹമീദലി ശിഹാബ് തങ്ങള്‍, യു.ആര്‍ പ്രദീപ് എം.എല്‍.എ, മതീന്‍ അഹമ്മദ് കൊല്‍ക്കത്ത, ഡോ. മുസ്തഫ കമാല്‍ ത്രിപുര, അബൂ സഈദ്, മുഹമ്മദ് അബ്ദുല്ല നുഅ്മാന്‍, റഹ്്മത്തുല്ല ഖാസിമി മൂത്തേടം, ഹമീദ് ഫൈസി അമ്പലക്കടവ്, നാസര്‍ ഫൈസി കൂടത്തായി, കബീര്‍ ബാഖവി കാഞ്ഞാര്‍ പങ്കെടുക്കും. സമാപന പ്രാര്‍ഥനക്ക് അത്തിപ്പറ്റ മൊയ്തീന്‍കുട്ടി മുസ്‌ലിയാര്‍ നേതൃത്വം നല്‍കും.
സുന്നി മഹല്ല് ഫെഡറേഷന്‍ മഹല്ലുകളില്‍ നടപ്പിലാക്കുന്ന പദ്ധതികളും പ്രവര്‍ത്തനങ്ങളും വിശദീകരിക്കുന്ന മഹല്ല് ജേണല്‍ ക്യാംപ് പ്രതിനിധികള്‍ക്ക് വിതരണം ചെയ്യും. ഓരോ സെഷനിലും വിഷയവുമായി ബന്ധപ്പെട്ട ഡോക്യുമെന്ററി പ്രദര്‍ശനവും ഉണ്ടാകും. പ്രോഗ്രാം കമ്മിറ്റി യോഗത്തില്‍ ചെയര്‍മാന്‍ ഡോ. ബഹാഉദ്ദീന്‍ മുഹമ്മദ് നദ്‌വി അധ്യക്ഷനായി. ഉമര്‍ ഫൈസി മുക്കം, അബ്ദുസ്സമദ് പൂക്കോട്ടൂര്‍, യു.ശാഫി ഹാജി ചെമ്മാട്, കെ.എസ് ഹംസ ദേശമംഗലം, എ.കെ ആലിപ്പറമ്പ്, സലാം ഫൈസി മുക്കം, ശംസുദ്ദീന്‍ ഒഴുകൂര്‍, ഇസ്മാഈല്‍ ഹുദവി ചെമ്മാട്, സുഹൈല്‍ ഹുദവി വിളയില്‍ പങ്കെടുത്തു.