പയ്യന്നൂര്‍: പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിക്കാന്‍ ശ്രമിച്ച സംഭവത്തില്‍ യുവാവിനെ ഒരു സംഘം മര്‍ദിച്ചു. എട്ടിക്കുളത്തെ കല്ലുമ്മക്കായ് വാരല്‍ തൊഴിലാളിയായ ചെറിയചാപ്പയില്‍ ഹാരിസി(28)നാണ് മര്‍ദനമേറ്റത്.
കഴിഞ്ഞ ശനിയാഴ്ച സുഹൃത്തിന്റെ വീട്ടില്‍ പോയി തിരിച്ച് വരികയായിരുന്ന 14കാരിക്ക് നേരെയാണ് പീഡന ശ്രമമുണ്ടായത്. വിവരമറിഞ്ഞ് ഇന്നലെ കണ്ണൂരില്‍ നിന്നെത്തിയ വനിതാ സെല്‍ എസ്.ഐ പി.ടി സുധ പെണ്‍കുട്ടിയുടെ വീട്ടിലെത്തി മൊഴി രേഖപ്പെടുത്തിയ ശേഷം ഹാരിസിനെതിരേ പൊക്‌സോ നിയമപ്രകാരം പയ്യന്നൂര്‍ പൊലിസ് കേസെടുത്തിരുന്നു.
സംഭവത്തെ തുടര്‍ന്ന് പ്രകോപിതരായ നാലംഗസംഘം ഇന്നലെ അര്‍ധരാത്രി എട്ടിക്കുളത്തെ ഹാരിസിന്റെ വീട്ടിലെത്തി ഇയാളെ വിളിച്ചിറക്കി കൂട്ടിക്കൊണ്ടുപോവുകയായിരുന്നു. തടയാന്‍ ശ്രമിച്ച ഹാരിസിന്റെ ഭാര്യ എം.പി സജിന(30)ക്കും മര്‍ദനമേറ്റു. ഹാരിസിനെ ബൈക്കില്‍ കയറ്റി എട്ടിക്കുളം ബീച്ചിലെത്തിച്ച് ഇരുമ്പുവടി കൊണ്ട് തലക്കടിച്ചുവെന്നും നിലവിളിച്ചപ്പോള്‍ അവിടെനിന്ന് ബലമായി കാറില്‍ കയറ്റി പാലക്കോട്ടേക്ക് കൊണ്ടുപോയി വീണ്ടും മര്‍ദിച്ചെന്നും ബോധരഹിതനായി താഴെ കിടന്നിരുന്ന തന്നെ ഓടിക്കൂടിയവരാണ് ആശുപത്രിയിലെത്തിച്ചതെന്നുമാണ് ഹാരിസ് പൊലിസിന് നല്‍കിയ മൊഴി.
ഇതുപ്രകാരം എട്ടിക്കുളത്തെ റാഫി, സിറാജ്, പാലക്കോട്ടെ അസീസ്, വലിയകടപ്പുറത്തെ ഫവാസ് എന്നിവര്‍ക്കെതിരേ പൊലിസ് കേസെടുത്തിട്ടുണ്ട്.