ചാലക്കുടി: കോടശ്ശേരി പഞ്ചായത്തില്‍ മണ്ണ് മാഫിയ സംഘം പിടിമുറുക്കുന്നു. ഒരു ഭാഗത്ത് കുന്നിടിച്ച് നിരത്തുമ്പോള്‍ മറുഭാഗത്ത് പാടശേഖരങ്ങള്‍ മണ്ണിട്ടു നികത്തുകയാണ്. മാഞ്ചിയംകുന്നാണ് മാഫിയ സംഘം ഇപ്പോള്‍ മണ്ണെടുത്ത് നിരത്തുന്നത്.
അതേസമയം കോടശ്ശേരി ഗ്രാമപഞ്ചായത്തിലെ കോനിക്കപ്പാടവും വ്യാപകമായ രീതിയില്‍ മണ്ണിട്ട് നികത്തികൊണ്ടിരിക്കുകയാണ്. നല്ല രീതിയില്‍ കൃഷി ചെയ്തിരുന്ന പാടശേഖരത്താണ് കോനിക്കപ്പാടം. ഈ പാടശേഖരത്തോട് ചേര്‍ന്നുള്ള ഏക്കര്‍ കണക്കിന് സ്ഥലത്ത് ഇപ്പോഴും നല്ല രീതിയില്‍ കൃഷി നടക്കുന്നുണ്ട്. പാടം നികത്തുന്നത് ഇവിടത്തെ കൃഷിക്കും ഭീഷണിയാണ്.
ഇപ്പോള്‍ തന്നെ ഈ പ്രദേശത്ത് കുടിവെള്ള ക്ഷാമം നേരിടുന്നുണ്ട്. കോനിക്കപാടം നികത്തിയാല്‍ പ്രദേശത്ത് വരള്‍ച്ച രൂക്ഷമാകും. സമീപ പ്രദേശങ്ങളിലെ കുന്നുകളിടിച്ചുള്ള മണ്ണാണ് മണ്ണ് മാഫിയ ഇവിടെകൊണ്ടു വന്നിടുന്നത്. രാത്രിസമയത്താണ് കൂടുതലായും മണ്ണ് കൊണ്ടുവരുന്ന വാഹനങ്ങളെത്തുന്നത്.
തെരഞ്ഞെടുപ്പ് ജോലികള്‍ ഉള്ളതിനാല്‍ ഉദ്യോഗസ്ഥരുടെ മൗനാനുമതിയോടെയാണ് പാടം നികത്തുന്ന പ്രവൃത്തികള്‍ നടക്കുന്നതെന്നാണ് ആക്ഷേപം. പ്രദേശവാസികളുടെ നേതൃത്വത്തില്‍ നിരവധി പരാതികള്‍ നല്‍കിയിട്ടും നടപടിയുണ്ടാകുന്നില്ലെന്നും പരാതിയുണ്ട്.
കോടശ്ശേരി ഗ്രാമപഞ്ചായത്തിലെ തന്നെ മാഞ്ചിയംകുന്ന് മണ്ണ് മാഫിയ സംഘം അനധികൃതമായി ഇടിച്ച് നിരത്തുകയാണെന്ന പരാതിയും ഉയര്‍ന്നിട്ടുണ്ട്. മണ്ണ് മാഫിയ സംഘങ്ങള്‍ക്ക് പൊലിസടക്കമുള്ള ഉദ്യോഗസ്ഥര്‍ കൂട്ട് നില്‍ക്കുകയാണെന്ന ആരോപണവും നിലനില്‍ക്കുന്നു. അനധികൃതമായി മണ്ണ് കടത്തുന്നതിനെതിരേ പ്രതിഷേധവുമായി എത്തുന്നവരെ ഭീഷണിപ്പെടുത്തി ഓടിച്ചും ഉദ്യോഗസ്ഥര്‍ക്ക് പണം നല്‍കി സ്വാധീനിച്ചുമാണ് ഇവിടെ കുന്നിടിച്ച് നികത്തുന്നത്. ഒരു പഞ്ചായത്തില്‍ ഒരു ഭാഗത്ത് കുന്നിടിച്ച് നിരത്തുകയും മറ്റൊരിടത്ത് പാടശേഖരങ്ങള്‍ വ്യപകമായി മണ്ണിട്ട് നികത്തുകയും ചെയ്തിട്ടും ബന്ധപ്പെട്ടവരുടെ ഭാഗത്ത് നിന്നും ഇടപെടലുകളില്ലെന്നു നാട്ടുകാര്‍ പരാതിപ്പെടുന്നു.