എടക്കാട്: വീട്ടില്‍ അതിക്രമിച്ചുകയറി ബി.ജെ.പി പ്രവര്‍ത്തകനെയും കുടുംബാഗങ്ങളെയും ആക്രമിച്ചകേസില്‍ അഞ്ച് സി.പി.എം പ്രവര്‍ത്തകര്‍ പൊലിസില്‍ കീഴടങ്ങി. എടക്കാട് ഒ.കെ യു.പി സ്‌കൂളിനു സമീപത്തെ രൂപേഷിന്റെ വീട്ടില്‍ അതിക്രമം നടത്തിയ കേസില്‍ എടക്കാട് സ്വദേശികളായ ഷമല്‍, സുജിത്ത്, ദിനേശന്‍, സജേഷ്, സജീഷ് എന്നിവരാണ് കീഴടങ്ങിയത്. കഴിഞ്ഞ മാര്‍ച്ച് 18ന് രാത്രി പത്തുമണിക്കാണ് കേസിനാസ്പദമായ സംഭവം. രൂപേഷിന്റെ വീട്ടില്‍ അതിക്രമിച്ചു കയറി മാതാപിതാക്കളെയും അമ്മാവനെയുമടക്കം ആക്രമിച്ചുവെന്നാണ് കേസ്. പരുക്കേറ്റവര്‍ ആശുപത്രിയില്‍ ചികിത്സ തേടിയിരുന്നു. സംഭവദിവസം റോഡില്‍ കൊടികെട്ടുന്നതുമായി ബന്ധപ്പെട്ടു രണ്ട് സി.പി. എം പ്രവര്‍ത്തകര്‍ക്ക് ബി.ജെ.പിക്കാരുടെ മര്‍ദനമേറ്റിരുന്നു. ഇതിന്റെ വിരോധത്തില്‍ വീടാക്രമിച്ചതായാണ് കേസ്.