തളിപ്പറമ്പ്: സി.പി.ഐ നേതാവും യുവ കലാസാഹിതി ജനറല്‍ സെക്രട്ടറിയുമായിരുന്ന എന്‍.സി മമ്മൂട്ടി മാസ്റ്ററുടെ ഒമ്പതാം ചരമവാര്‍ഷികവും അവാര്‍ഡ് സമര്‍പ്പണവും ഡോ. ഖദീജ മുംതാസ് ഉദ്ഘാടനം ചെയ്തു. തളിപ്പറമ്പ് ടൗണ്‍ സ്‌ക്വയറില്‍ നടന്ന ചടങ്ങില്‍ പന്ന്യന്‍ രവീന്ദ്രന്‍ അധ്യക്ഷനായി. കവിയും നോവലിസ്റ്റുമായ മുണ്ട്യാടി ദാമോദരനാണ് ഇത്തവണത്തെ മമ്മൂട്ടി സ്മാരക അവാര്‍ഡിന് അര്‍ഹനായത്. ആദരപത്രവും, 15,000 രൂപയും അടങ്ങുന്നതാണ് അവാര്‍ഡ്. അവാര്‍ഡ് തുക യുവ കലാസാഹിതിയുടെ തുടര്‍പ്രവര്‍ത്തനങ്ങള്‍ക്കായി ചടങ്ങില്‍ സംഘാടകരെ മുണ്ട്യാടി ദാമോദരന്‍ തിരികെയേല്‍പ്പിച്ചു. സതീഷ് ബാബു ഇവ്റ്റ കാവ്യാലാപനവും പി.കെ ഗോപി അനുസ്മരണ പ്രഭാഷണവും നടത്തി. ഇ.എം സതീശന്‍, ടി.വി ബാലന്‍, വി. ആയിഷ ബീവി എ.ആര്‍.സി നായര്‍, പി. അജയകുമാര്‍ സംസാരിച്ചു.