വളപട്ടണം: എ.ബി.വി.പി പ്രവര്‍ത്തകനെ വെട്ടിപരുക്കേല്‍പ്പിച്ച കേസില്‍ എസ്.എഫ്.ഐ നേതാക്കള്‍ അറസ്റ്റില്‍. തളിപ്പറമ്പ് മൂത്തേടത്ത് ഹയര്‍സെക്കന്‍ഡറിസ്‌കൂള്‍ പ്ലസ്ടു വിദ്യാര്‍ഥി അഞ്ചാംപീടിക ചെല്ലട്ടന്‍ ക്ഷേത്രത്തിനു സമീപത്തെ നെല്ലിക്കുന്നത്ത് വീട്ടില്‍ ഉദയിനെ(17) വെട്ടിപരുക്കേല്‍പ്പിച്ച കേസിലാണ് എസ്.എഫ്.ഐ തളിപ്പറമ്പ് ഏരിയാ സെക്രട്ടറി മൊറാഴ വാടിവീട്ടില്‍ പ്രജീഷ്ബാബു(22), വൈസ് പ്രസി. എരുവേശി പൂപ്പറമ്പിലെ വൈശാഖ്(20) എന്നിവരെ വളപട്ടണം സി.ഐ ടി.കെ രത്‌നകുമാര്‍ അറസ്റ്റു ചെയ്തത്. ശനിയാഴ്ച വൈകുന്നേരം മൂന്നോടെയാണ് ഉദയന് വെട്ടേറ്റത്. തളിപ്പറമ്പില്‍ നിന്നു അഞ്ചാംപീടിക ചിത്ര സ്‌റ്റോപ്പില്‍ ബസിറങ്ങി വീട്ടിലേക്ക് നടന്നുപോകവേ ബൈക്കിലെത്തിയ സംഘമാണ് വെട്ടിപരുക്കേല്‍പ്പിച്ചത്. കൈക്കും ശരീരത്തിന്റെ മറ്റുഭാഗങ്ങളിലും വെട്ടേറ്റ ഉദയിനെ നാട്ടുകാര്‍ ആദ്യം കൊയിലി ആശുപത്രിയിലും പിന്നീട് തലശേരി ഇന്ദിരാഗാന്ധി സഹ. ആശുപത്രിയിലും പ്രവേശിപ്പിച്ചു. മൂത്തേടത്ത് സ്‌കൂളിലെ വിദ്യാര്‍ഥി സംഘര്‍ഷമാണ് അക്രമത്തില്‍ കലാശിച്ചത്.