കൊവിഡ് നിരീക്ഷണത്തിലുള്ളവരെ ബോധവല്‍ക്കരിക്കും
സ്വന്തം ലേഖകന്‍
തിരുവനന്തപുരം: കൊവിഡ് നിരീക്ഷണത്തിലുള്ളവര്‍ ക്വാറന്റൈന്‍ ലംഘിക്കുന്നില്ലെന്ന് ഉറപ്പാക്കാന്‍ പാര്‍ട്ടി ഘടകങ്ങള്‍ക്ക് നിര്‍ദേശം നല്‍കാന്‍ സി.പി.എം സംസ്ഥാന കമ്മിറ്റിയില്‍ തീരുമാനം. വിഡിയോ കോണ്‍ഫറന്‍സിങ്ങിലൂടെ നടന്ന യോഗത്തിലാണ് തീരുമാനമെടുത്തത്.
എല്ലാ ബ്രാഞ്ച് കമ്മിറ്റികള്‍ക്കുമായിരിക്കും ചുമതല. ക്വാറന്റൈനില്‍ കഴിയുന്നവരുടെ വീടുകള്‍ ബ്രാഞ്ച് കമ്മിറ്റി അംഗങ്ങള്‍ നിത്യവും സന്ദര്‍ശിക്കുകയും ക്വാറന്റൈനിലുള്ളവര്‍ മറ്റുള്ളവരുമായി ഇടപഴകുന്നുണ്ടോയെന്ന് നിരീക്ഷിക്കുകയും ചെയ്യും. കൂടാതെ നിരീക്ഷണത്തിലുള്ളവരെയും കുടുംബാംഗങ്ങളെയും ബോധവല്‍ക്കരിക്കുകയും ചെയ്യണം. വീടുകളില്‍ ക്വാറന്റൈന്‍ സൗകര്യമുണ്ടോയെന്ന് പാര്‍ട്ടി അംഗങ്ങള്‍ പരിശോധിച്ച് അവര്‍ക്ക് സൗകര്യമൊരുക്കാനുള്ള ഇടപെടല്‍ നടത്തണം. സാമ്പത്തികമായി പിന്നാക്കം നില്‍ക്കുന്നവരുടെ വീടുകളില്‍ സൗകര്യമില്ലെങ്കില്‍ അതിനുള്ള സൗകര്യമൊരുക്കാന്‍ ഇടപെടല്‍ നടത്തണം. ബ്രാഞ്ചിന് കീഴില്‍ കൊവിഡ് രോഗികളുണ്ടായാല്‍ അവരെ ഒറ്റപ്പെടുത്തുന്ന അവസ്ഥ ഉണ്ടാകരുത്. ഇതുസംബന്ധിച്ച നിര്‍ദേശങ്ങള്‍ ഇന്ന് രാവിലെ പത്തിന് ജില്ലാ, ഏരിയാ, ലോക്കല്‍ തലത്തില്‍ ഓണ്‍ലൈനില്‍ റിപ്പോര്‍ട്ട് ചെയ്യാനും സംസ്ഥാന കമ്മിറ്റിയില്‍ തീരുമാനിച്ചു.
കൊവിഡ് പ്രതിരോധത്തില്‍ സംസ്ഥാന സര്‍ക്കാരിന് വീഴ്ചയുണ്ടായിട്ടില്ലെന്ന് പാര്‍ട്ടി വിലയിരുത്തി. ഒക്‌ടോബറില്‍ നടക്കുന്ന തദ്ദേശതെരഞ്ഞെടുപ്പിന് ഒരുങ്ങാന്‍ പാര്‍ട്ടി ഘടകങ്ങള്‍ക്ക് നിര്‍ദേശം നല്‍കാനും തീരുമാനമായി. തെരഞ്ഞെടുപ്പ് പ്രചാരണത്തില്‍ കൊവിഡ് വലിയ മാറ്റമുണ്ടാക്കുമെന്നാണ് സംസ്ഥാന കമ്മിറ്റിയുടെ വിലയിരുത്തല്‍. അതിനാല്‍ പ്രവര്‍ത്തകര്‍ക്ക് ഡിജിറ്റല്‍ പ്രചാരണത്തില്‍ പരിശീലനം നല്‍കാനും തീരുമാനമായി.
സംസ്ഥാന കമ്മിറ്റിയില്‍ നടക്കുന്ന ചര്‍ച്ചകളും മറ്റു വിവരങ്ങളും ചോരാതിരിക്കാന്‍ സ്വതന്ത്ര സോഫ്റ്റ്‌വെയര്‍ പ്ലാറ്റ്‌ഫോമിലാണ് സംസ്ഥാന കമ്മിറ്റി ചേര്‍ന്നത്. സെക്രട്ടറിയേറ്റ് അംഗങ്ങള്‍ എ.കെ.ജി സെന്ററിലും സംസ്ഥാന കമ്മിറ്റി അംഗങ്ങള്‍ അതാത് ജില്ലാകമ്മിറ്റി ഓഫിസുകളിലും ഇരുന്നാണ് യോഗത്തില്‍ പങ്കെടുത്തത്. പി.ബി അംഗം എസ്.രാമചന്ദ്രന്‍പിള്ള രാഷ്ട്രീയ റിപ്പോര്‍ട്ടിങ് നടത്തി. സംസ്ഥാന സെക്രട്ടറി കോടിയേരി ബാലകൃഷ്ണന്‍ സംസാരിച്ചു. പി.ബി അംഗങ്ങളായ പിണറായി വിജയന്‍, എം.എ ബേബി എന്നിവര്‍ പങ്കെടുത്തു.