കൊല്ലം:  ഒരു കാലത്ത് ജില്ലയിലെ ഏറ്റവും പ്രമുഖ  ആതുരാലയമായിരുന്ന ശങ്കേഴ്‌സ് ആശുപത്രിയെ തകര്‍ക്കാന്‍   ശ്രീനാരായണീയര്‍ അനുവദിക്കില്ലെന്ന്   കെ.പി.സി.സി ജനറല്‍ സെക്രട്ടറി എം. ലിജു പറഞ്ഞു.   ശങ്കേഴ്‌സ് ആശുപത്രിയെ സംരക്ഷിക്കണമെന്നാവശ്യപ്പെട്ടും വെളളാപ്പളളി നടേശന്‍ രാജിവെയ്ക്കണമെന്നാവശ്യപ്പെട്ടുകൊണ്ടും എസ്.എന്‍.ഡി.പി ഏകോപനസമിതിയുടെ നേതൃത്വത്തില്‍ ശങ്കേഴ്‌സ് ആശുപത്രിക്ക് മുന്നില്‍ നടന്ന ധര്‍ണ്ണ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
സമൂഹത്തിലെ പട്ടിണിപാവങ്ങളില്‍ നിന്നും പിടിയരിയും കെട്ടുതേങ്ങയും ശേഖരിച്ച് ആര്‍. ശങ്കര്‍ പടുത്തുയര്‍ത്തിയ ശ്രീനാരായണപ്രസ്ഥാനങ്ങളില്‍ നിന്നും ഇപ്പോള്‍  പാവങ്ങളെ ആട്ടിയോടിക്കുകയാണ്. നിയമനത്തിനും അഡ്മിഷനുമായി ലക്ഷങ്ങളാണ് ഇന്ന് കോഴ വാങ്ങുന്നത്. ഇതൊന്നും കണ്ടില്ലെന്ന് നടിച്ച് മുന്നോട്ട് പോകാന്‍ കഴിയില്ലെന്നും  ലിജു പറഞ്ഞു.
ധര്‍ണയ്ക്ക് മുന്നോടിയായി ചിന്നക്കട ആര്‍. ശങ്കര്‍ സ്വകയറില്‍ നിന്നും ആരംഭിച്ച മാര്‍ച്ചില്‍ നൂറുകണക്കിന് ശ്രീനാരായണീയര്‍ പങ്കെടുത്തു. കൊല്ലം യൂനിയന്‍ മുന്‍ പ്രസിഡന്റ് ശ്രീ. ബി. പുരുഷോത്തമന്‍ അധ്യക്ഷനായി. മുന്‍ യോഗം ജനറല്‍ സെക്രട്ടറി അഡ്വ. കെ. ഗോപിനാഥന്‍ മുഖ്യപ്രഭാഷണം നടത്തി.