തുറവൂര്‍: കുത്തിയതോട് പഞ്ചായത്തില്‍ പതിനായിരം പച്ചക്കറിത്തൈകള്‍ വിതരണം ചെയ്തു. കൃഷിഭവന്റെ സഹകരണത്തോടെ നടത്തിയ കര്‍ഷക സഭയിലാണ് ഇവ നല്‍കിയത്. കൂടാതെ നാലായിരം കുടുംബങ്ങള്‍ക്ക് പച്ചക്കറിവിത്തും 2200 പേര്‍ക്ക് കുരുമുളക് തൈകളും വിതരണം ചെയ്തു. കൃഷി വകുപ്പും ഗ്രാമ പഞ്ചായത്തും നടപ്പാക്കുന്ന കാര്‍ഷിക പദ്ധതികളുടെ പ്രചാരണം ലക്ഷ്യമിട്ടാണ് കുത്തിയതോട് കൃഷി ഭവന്റെ സഹായത്തോടെ പരിപാടി നടത്തിയത്.
ഞാറ്റുവേല ചന്തയിലൂടെ ധാരാളം ഉല്പന്നങ്ങളും ലഭ്യമാക്കിയിരുന്നു. ആഗ്രോ സര്‍വിസ് സംഘത്തിന്റെ വിവിധ കാര്‍ഷികയന്ത്രങ്ങളുടെ പ്രദര്‍ശനവും സേവനങ്ങളുടെ വിശദാംശങ്ങളും കര്‍ഷകര്‍ക്ക് ലഭ്യമാക്കി. കാര്‍ഷിക ഉല്‍പ്പന്ന ചന്തയിലൂടെ പച്ചക്കറികളും കിഴങ്ങുകളും ലഭ്യമാക്കി. കുത്തിയതോട് പഞ്ചായത്ത് പ്രസിഡന്റ് പ്രേമരാജപ്പന്‍ അധ്യക്ഷനായി. പഞ്ചായത്തംഗങ്ങളായ കെ. ധനേഷ്‌കുമാര്‍, കെ.കെ സജീവന്‍, വിപിന്‍, ആര്‍. ഹരീഷ്, ആശാകുമാരി, മാലതി, കൃഷി ഓഫിസര്‍ സി.വി സൂസമ്മ, ആശോകന്‍, കൃഷി വകുപ്പിലെയും ആത്മയിലേയും ഉദ്യോഗസ്ഥന്മാര്‍ തുടങ്ങിയവര്‍ പ്രസംഗിച്ചു.