ഫറോക്ക്: വൃദ്ധനെ കാണാതായതിനെ തുടര്‍ന്ന് ചാലിയാറില്‍ തെരച്ചില്‍ നടത്തി. മീഞ്ചന്ത സ്വദേശി പുതിയേടത്ത് വീട്ടില്‍ അപ്പുനായരെ(90)യാണു കാണാതായതായി ഫറോക്ക് പൊലിസില്‍ പരാതി ലഭിച്ചത്.
ചൊവ്വ രാവിലെ രാമനാട്ടുകരയിലെ മകളുടെ വീട്ടില്‍ നിന്ന് ഗുരുവായൂരപ്പന്‍ കോളജിനു സമീപത്തെ മകന്‍ വിനോദ്കുമാറിന്റെ വീട്ടിലേക്കെന്നു പറഞ്ഞിറങ്ങിയ ശേഷമാണ് ഇയാളെ കുറിച്ചു വിവരമില്ലാതായത്. ഇതിനെ തുടര്‍ന്നാണു മകന്‍ പരാതി നല്‍കിയത്.
ഫറോക്ക് പുതിയപാലത്തിനു സമീപം ചാലിയാറിലേക്ക് ഒരാള്‍ ചാടിയെന്ന ഊഹാപോഹത്തിന്റെ അടിസ്ഥാനത്തില്‍ ഫറോക്ക് പൊലിസും തീരദേശ പൊലിസും ഇന്നലെ രാവിലെ തെരച്ചില്‍ നടത്തി. മണിക്കൂറുകളോളം ചാലിയാര്‍ പുഴയില്‍ ഫറോക്ക് പുതിയപാലത്തിനും പഴയപാലത്തിനും സമീപത്തായി തീരദേശ പൊലിസിന്റെ ബോട്ട് ഉപയോഗിച്ചു തെരച്ചില്‍ നടത്തിയെങ്കിലും ഫലമുണ്ടായില്ല.