#വി.എസ് പ്രമോദ്

തിരുവനന്തപുരം: കേരള സര്‍വിസ് റൂള്‍സില്‍നിന്നും (കെ.എസ്.ആര്‍) മുക്തമാക്കി കെ.എസ്.ആര്‍.ടി.സി കോര്‍പറേഷനു മാത്രമായി ഒരു സര്‍വിസ് റൂള്‍ തയാറാക്കണമെന്നതുള്‍പ്പെടെയുള്ള നിര്‍ദേശങ്ങള്‍ ഉള്‍ക്കൊള്ളിച്ചുള്ള സേവന വേതന കരാര്‍, ചര്‍ച്ചക്കായി തൊഴിലാളി യൂനിയനുകള്‍ക്ക് മാനേജ്‌മെന്റ് കൈമാറി.

കെ.എസ്.ആറില്‍നിന്നും കോര്‍പറേഷനെ മുക്തമാക്കണമെന്നതുള്‍പ്പെടെയുള്ള വിവാദമായേക്കാവുന്ന നിരവധി കാര്യങ്ങളാണ് ശമ്പള പരിഷ്‌കരണ ചര്‍ച്ചക്കുവേണ്ടിയുള്ള കുറിപ്പിലുള്ളത്. ഇനി മുതല്‍ ഓപ്പറേറ്റിങ് വിഭാഗത്തില്‍ ഡ്രൈവര്‍ കം കണ്ടക്ടര്‍ തസ്തികയിലേക്ക് മാത്രമാകും ജീവനക്കാരെ നിയോഗിക്കുക. സ്ഥലംമാറ്റം സംബന്ധിച്ച ദ്വികക്ഷി കരാര്‍ ഉണ്ടെങ്കിലും അത് കാലോചിതമായി പരിഷ്‌കരിക്കേണ്ടതുണ്ട്.

നിലവില്‍ കോര്‍പറേഷനില്‍ ഇല്ലാത്തതും പുതിയതായി ജീവനക്കാരെ നിയമിക്കാത്തതുമായ അനാവശ്യ തസ്തികകളെ ശമ്പള പരിഷ്‌കരണ കരാറില്‍നിന്നും ഒഴിവാക്കുന്നതും മാനേജ്‌മെന്റ് ചൂണ്ടിക്കാട്ടുന്നു. സുശീല്‍ഖന്ന റിപ്പോര്‍ട്ടിന്റെ അടിസ്ഥാനത്തില്‍ ബസും ജീവനക്കാരും തമ്മിലുള്ള അനുപാതം 5:5 എന്ന ദേശീയ ശരാശരിയിലേക്ക് എത്തിക്കുന്നതിന് ആവശ്യമായ അഭിപ്രായങ്ങളും മാനേജ്‌മെന്റ് യൂനിയനുകളോട് ആരാഞ്ഞിട്ടുണ്ട്. സര്‍ക്കാര്‍ ജീവനക്കാരുടെ ശമ്പള പരിഷ്‌കരണത്തിന്റെ ചുവടുപിടിച്ചാണ് കെ.എസ്.ആര്‍.ടി.സിയില്‍ ശമ്പള പരിഷ്‌കരണം നടത്താന്‍ ഉദ്ദേശിക്കുന്നതെന്നും മാനേജ്‌മെന്റ് വ്യക്തമാക്കുന്നു.

ശമ്പള പരിഷ്‌കരണം സംബന്ധിച്ച കുറിപ്പ് ചര്‍ച്ചചെയ്ത് നിര്‍ദേശങ്ങള്‍ മാനേജിങ് ഡയരക്ടര്‍ക്ക് സമര്‍പ്പിക്കുന്നതിനായി കെ.എസ്.ആര്‍.ടി.സി എംപ്ലോയിസ് അസോസിയേഷന്‍(സി.ഐ.ടി.യു),ട്രാന്‍സ്‌പോര്‍ട്ട് ഡെമോക്രാറ്റിക് ഫെഡറേഷന്‍ എന്നീ യൂനിയനുകള്‍ക്ക് മാത്രമാണ് മാനേജ്‌മെന്റ് കുറിപ്പ് നല്‍കിയിട്ടുള്ളത്. 10-ാം ശമ്പള കമ്മിഷന്‍ റിപ്പോര്‍ട്ടിന്റെ അടിസ്ഥാനത്തില്‍ മറ്റു വകുപ്പുകളിലെ സര്‍ക്കാര്‍ ജീവനക്കാര്‍ക്ക് 2014 ജൂലൈയില്‍ നടപ്പിലാക്കിയ ശമ്പള സ്‌കെയിലാണ് കെ.എസ്.ആര്‍.ടി.സിയില്‍ ഇപ്പോള്‍ നടപ്പാക്കാനായി ചര്‍ച്ചക്കു നല്‍കിയിരിക്കുന്നതെന്ന ആക്ഷേപം തൊഴിലാളികള്‍ക്കിടയില്‍ ഉയര്‍ന്നു കഴിഞ്ഞു.

11-ാം ശമ്പള കമ്മിഷന്‍ മൂന്നു മാസത്തിനുള്ളില്‍ രൂപീകരിക്കുമെന്ന് ധനമന്ത്രി തോമസ് ഐസക് ബജറ്റ് പ്രസംഗത്തില്‍ പറഞ്ഞിരുന്നു. ഇത് വരാനിരിക്കേയാണ് പഴയ രീതിയില്‍ ശമ്പള പരിഷ്‌കരണം നടപ്പിലാക്കാന്‍ നീക്കം നടക്കുന്നതെന്നും പുതിയ പരിഷ്‌കരണം വരുന്നതുവരെ കാത്തിരിക്കാന്‍ തയാറാണെന്ന നിലപാടിലുമാണ് തൊഴിലാളികള്‍. 2016 ഫെബ്രുവരിയില്‍ കെ.എസ്.ആര്‍.ടി.സിയില്‍ ശമ്പളം പരിഷ്‌കരണം നടപ്പിലാക്കേണ്ടതായിരുന്നു. പക്ഷേ രൂക്ഷമായ സാമ്പത്തിക പ്രതിസന്ധികള്‍ കാരണം നടപ്പിലാക്കാന്‍ കഴിയാതെ പോകുകയായിരുന്നു. അതേസമയം രണ്ട് യൂനിയനുകള്‍ക്ക് മാത്രം ശമ്പള പരിഷ്‌കരണം സംബന്ധിച്ച കുറിപ്പ് നല്‍കിയത് ഐ.എന്‍.ടി.യു.സി, എ.ഐ.ടി.യു.സി, ബി.എം.എസ്, ഡ്രൈവേഴ്‌സ് യൂനിയന്‍ തുടങ്ങിയ യൂനിയനുകളില്‍ പ്രതിഷേധത്തിന് ഇടയാക്കിയിട്ടുണ്ട്.