കിനാലൂര്‍: പനങ്ങാട് ഗ്രാമപഞ്ചായത്തിന്റെയും പി.ഇ.സിയുടെയും ആഭിമുഖ്യത്തില്‍ വയലടയില്‍ നിന്നു തലയാട്ടേക്ക് സംഘടിപ്പിച്ച മഴ നടത്തം ശ്രദ്ധേയമായി. ഗ്രാമപഞ്ചായത്തിലെ 11 വിദ്യാലയങ്ങളില്‍ നിന്നായി 300ഓളം കുട്ടികളും  കുടുംബശ്രീ, പരിസ്ഥിതി പ്രവര്‍ത്തകരും മഴയെ വരവേറ്റ് പ്രകൃതിയെ ആസ്വദിച്ചും റോഡിന്റെ വശങ്ങളില്‍ മരം നട്ടും പരിസ്ഥിതി ബോധവല്‍ക്കരണത്തിന് പുത്തന്‍ ചുവട്‌വയ്പ്പ് തീര്‍ത്തു. വഴിയോരങ്ങളില്‍ കുടുംബശ്രീ പ്രവര്‍ത്തകര്‍ പായസവും മധുര പലഹാരങ്ങളും നല്‍കി ജാഥയെ സ്വീകരിച്ചു.
തലയാട്ട് വ്യാപാരി വ്യവസായി ഏകോപന സമിതിയുടെ ആഭിമുഖ്യത്തില്‍ വരവേല്‍പ്പ് നല്‍കി. ഗ്രാമപഞ്ചായത്തംഗം ടി.കെ ബിജു സ്വാഗതം പറഞ്ഞു. പഞ്ചായത്ത് പ്രസിഡന്റ് വി.എം കമലാക്ഷി അധ്യക്ഷനായി. പരിസ്ഥിതി പ്രവര്‍ത്തകന്‍ പ്രൊഫ. ശോഭീന്ദ്രന്‍ വൃക്ഷത്തൈ നട്ട് മഴ നടത്തം ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്റ് പി. ഉസ്മാന്‍, വിദ്യാഭ്യാസ സ്ഥിരംസമിതി ചെയര്‍പേഴ്‌സന്‍ എല്‍.വി വിലാസിനി, മുന്‍ പ്രസിഡന്റ് ഇസ്മാഈല്‍ കുറുമ്പൊയില്‍, പഞ്ചായത്തംഗങ്ങളായ നാസര്‍ പറയരുകണ്ടി, സുരേഷ്, ഹമീദാ കബീര്‍, വയലട എ.എല്‍.പി സ്‌കൂള്‍ ഹെഡ്മാസ്റ്റര്‍ നരേന്ദ്ര ബാബു, പി.ഇ.സി കണ്‍വീനര്‍ ഇഖ്ബാല്‍ മാസ്റ്റര്‍ പങ്കെടുത്തു.
കിനാലൂര്‍ ജി.യു.പി സ്‌കൂള്‍ സംഗീതശില്‍പ്പം അവതരിപ്പിച്ചു. മഴ നടത്തത്തില്‍ പങ്കെടുത്തവര്‍ക്ക് ഗ്രാമപഞ്ചായത്ത് സര്‍ട്ടിഫിക്കറ്റുകള്‍ വിതരണം ചെയ്തു. പി.സി പുഷ്പ, കോട്ടയില്‍ മുഹമ്മദ്, പി.ആര്‍ സുരേഷ്, ഷൈമ കോറോത്ത്, കെ.എല്‍ മാത്യു, ബെന്നി ജോസഫ് സംസാരിച്ചു.