ദിസ്പുര്‍: ഒഡിഷയില്‍ ഭാര്യയുടെ മൃതദേഹം ചുമലില്‍ ചുമന്ന് കിലോമീറ്ററുകള്‍ താണ്ടിയ വാര്‍ത്ത പുറത്തുവന്ന് എട്ടുമാസത്തിനു ശേഷം, ഇതാ വീണ്ടുമൊരു സമാന സംഭവം. സഹോദരന്റെ മൃതദേഹം സൈക്കിളില്‍ കെട്ടിവച്ച് കൊണ്ടുപോവുന്ന ചിത്രവും ദൃശ്യവുമാണ് മന:സാക്ഷിയെ ഞെട്ടിക്കുന്നത്. അസമില്‍ മുഖ്യമന്ത്രി സര്‍ബാനന്ദ സൊനോവാലിന്റെ സ്വന്തം മണ്ഡലമായ മാജുലിയിലാണ് സംഭവം. സംഭവം ടി.വിയില്‍ വാര്‍ത്തയായ ഉടനെ മുഖ്യമന്ത്രി അന്വേഷണത്തിന് ഉത്തരവിടുകയും മുതിര്‍ന്ന ആരോഗ്യ ഉദ്യോഗസ്ഥരെ സ്ഥലത്തേക്ക് അയക്കുകയും ചെയ്തു.

ആശുപത്രി വാഹനത്തിന്റെ ഡ്രൈവറെ കാത്തുനില്‍ക്കാതെ മൃതദേഹം സൈക്കിളില്‍ കൊണ്ടുപോവുകയായിരുന്നുവെന്ന് പ്രാദേശിക ഉദ്യോഗസ്ഥര്‍ പറഞ്ഞു. ലക്ഷ്മിപൂര്‍ ജില്ലയിലെ ബലിജാനില്‍ നിന്നുള്ളതാണ് കുടുംബം. ഇവരുടെ ഗ്രാമത്തിലേക്ക് മോട്ടോര്‍ വാഹനം പോകുന്ന റോഡില്ലെന്നും, ഇടയില്‍ മുള കൊണ്ടുള്ള പാലമുള്ളതിനാലാണ് സൈക്കിളില്‍ കൊണ്ടുപോയതെന്നുമാണ് വിശദീകരണം.

ഡിംപിള്‍ ദാസ് എന്നയാളുടെ മൃതദേഹമാണ് 18 കാരനായ സഹോദരന്‍ സൈക്കിളില്‍ കെട്ടിവച്ച് വീട്ടില്‍ കൊണ്ടുപോയത്. പുലര്‍ച്ചെ മൂന്നര മണിയോടെ ആറു പേര്‍ ചേര്‍ന്ന് ഡിംപിള്‍ ദാസിനെ ആശുപത്രിയില്‍ കൊണ്ടുവന്നു. ഡ്യൂട്ടി ഡോക്ടര്‍ പരിശോധിക്കുമ്പോള്‍ മരിച്ചതായി അറിഞ്ഞു. ഇതോടെ അവര്‍ മൃതദേഹം സൈക്കിളില്‍ കെട്ടി കൊണ്ടുപോവുകയായിരുന്നു.