റിയാദ്: സഊദി അറേബ്യായിലെ നജ്‌റാനിൽ ഹൂതികൾ വിക്ഷേപിച്ച മിസൈൽ തകർത്തതായി സഊദി നേതൃത്വത്തിലുള്ള അറബ് സഖ്യ സേന അറിയിച്ചു. ശനിയാഴ്ച്ച രാവിലെയാണ് സഊദി ജനവാസ കേന്ദ്രം ലക്ഷ്യമാക്കി യമനിലെ വിമത വിഭാഗമായ ഇറാൻ അനുകൂല ഹൂതികൾ ബാലിസ്റ്റിക് മിസൈൽ തൊടുത്തു വിട്ടത്. എന്നാൽ, ഹൂതികളുടെ ലക്ഷ്യം തകർത്തതായും ആകാശത്ത് വെച്ച് തന്നെ മിസായിൽ തകർക്കാൻ കഴിഞ്ഞതിനാൽ വൻ അപകടങ്ങൾ ഒഴിവായതായും അറബ്സഖ്യ സേന വക്താവ് കേണൽ തുർക്കി അൽ മാലികി അറിയിച്ചു. യെമന്റെ അതിർത്തിക്കടുത്തുള്ള തെക്കുപടിഞ്ഞാറൻ സഊദി അറേബ്യയിലെ നഗരമാണ് നജ്‌റാൻ.

   മിസൈൽ അവശിഷ്‌ടങ്ങൾ തെറിച്ച് ചിലർക്ക് പരിക്കേറ്റിട്ടുണ്ട്. എന്നാൽ,ആക്രമണത്തിൽ മരണമോ മറ്റു കൂടുതൽ നാശ നഷ്‌ടങ്ങളോ സംഭവിച്ചിട്ടില്ല. യെമൻ നഗരമായ സഅദയിൽ നിന്നാണ് മിസൈൽ വിക്ഷേപിച്ചതെന്ന് അറബ് സഖ്യ സേനയെ ഉദ്ധരിച്ച് സഊദി ദേശീയ വാർത്താ മാധ്യമം എസ് പി എ റിപ്പോർട്ട് ചെയ്‌തു. 2014 മാർച്ചിൽ ഇറാൻ പിന്തുണയുള്ള ഹൂത്തികൾ അധികാരം പിടിച്ചെടുത്തതോടെ അന്താരാഷ്ട്ര അംഗീകാരമുള്ള സർക്കാരിനെ അധികാരത്തിൽ തിരിച്ചെത്തിക്കാൻ 2015 മാർച്ച് മുതൽ അറബ് സഖ്യം യെമനിൽ ഇടപെട്ടു വരികയാണ്.