ഡെറാഡൂണ്‍: ബോര്‍ഡിങ് സ്‌കൂളിലെ ഏഴാംക്ലാസുകാരനെ മുതിര്‍ന്ന വിദ്യാര്‍ഥികള്‍ കൊലപ്പെടുത്തി. സ്‌കൂള്‍ അധികൃതര്‍ മൃതദേഹം കാംപസില്‍ കുഴിച്ചുമൂടി.

12 വയസ്സുള്ള കുട്ടിയാണ് മുതിര്‍ന്ന വിദ്യാര്‍ഥികളുടെ ക്രൂരമായ മര്‍ദനത്തെ തുടര്‍ന്ന് കൊല്ലപ്പെട്ടത്.
അധികൃതര്‍ സംഭവം പൊലിസിനെയോ കുട്ടിയുടെ രക്ഷിതാക്കളെയോ അറിയിക്കാതെ സ്‌കൂള്‍ കാംപസില്‍ മൃതദേഹം മറവുചെയ്യുകയായിരുന്നു. കുട്ടികള്‍ ക്യാംപസില്‍ നിന്നു പുറത്തുപോവുന്നത് സ്‌കൂള്‍ അധികൃതര്‍ ഈയിടെ നിരോധിച്ചിരുന്നു. തീരുമാനത്തിനു കാരണം ഈ കുട്ടിയാണെന്ന് ആരോപിച്ചായിരുന്നു മര്‍ദനം.
ക്രിക്കറ്റ് ബാറ്റ്, സ്റ്റംപ് എന്നിവ കൊണ്ട് കുട്ടിയെ അടിക്കുകയായിരുന്നു.

കൊല്ലപ്പെട്ട കുട്ടി സ്‌കൂളില്‍നിന്നുള്ള വിനോദയാത്രക്കിടെ ബിസ്‌കറ്റ് മോഷ്ടിച്ചിരുന്നുവത്രേ. ഇതാണ് കുട്ടികള്‍ പുറത്തുപോവുന്നത് മാനേജ്‌മെന്റ് കര്‍ശനമായി തടയാന്‍ കാരണം.

മാര്‍ച്ച് 10ന് നടന്ന കൊലപാതകത്തില്‍ ബാലാവകാശ സംരക്ഷണ കമ്മിഷന്‍ ഇടപെട്ടതോടെ ഇന്നലെയാണ് സംഭവം പുറംലോകം അറിയുന്നത്.

ഇതുമായി ബന്ധപ്പെട്ട് പൊലിസ് സ്‌കൂള്‍ മാനേജര്‍, വാര്‍ഡന്‍, കായികാധ്യാപകന്‍, രണ്ടു വിദ്യാര്‍ഥികള്‍ എന്നിവരെ അറസ്റ്റ് ചെയ്തു.

ഇവര്‍ക്കെതിരേ കൊലക്കുറ്റം ചുമത്തിയിട്ടുണ്ടെന്ന് പൊലിസ് പറഞ്ഞു.