പുതുക്കാട്: ആനന്ദപുരത്ത് നമ്പിയംകാവ് റോഡില്‍ കടയില്‍ കയറി വയോധികയുടെ സ്വര്‍ണമാല കവര്‍ന്ന യുവാവിനെ നാട്ടുകാര്‍ പിടികൂടി പൊലിസിലേല്‍പ്പിച്ചു.
ആലപ്പുഴ കായംകുളം മുളയ്ക്കല്‍ തറയില്‍ വീട്ടില്‍ അജാസ് (30)നെയാണു പിടികൂടിയത്. തിങ്കളാഴ്ച വൈകീട്ട് അഞ്ചോടെയായിരുന്നു സംഭവം.
സ്‌കൂട്ടറില്‍ എത്തിയ യുവാവ് സോഡ കുടിക്കുന്നതിനായി കടയില്‍ കയറി മാല പൊട്ടിച്ച് രക്ഷപ്പെടുകയായിരുന്നു.
നെരേപറമ്പില്‍ പോളിന്റെഭാര്യ ഗ്രെയ്‌സി (60)യുടെ രണ്ട് പവന്‍ തൂക്കം വരുന്ന മാലയാണ് കവര്‍ന്നത്.
സംഭവ സമയത്ത് കടയുടെ സമീപത്ത് ഉണ്ടായിരുന്ന ആള്‍ വിവരം അറിയിച്ചതനുസരിച്ച് രണ്ടു കിലോമീറ്റര്‍ അകലെ വച്ചു ഇയാളെ നാട്ടുകാര്‍ പിടികൂടുകയായിരുന്നു. സ്വര്‍ണമാല അജാസിന്റെ പക്കല്‍ നിന്നും കണ്ടെടുത്തു.
തുടര്‍ന്നു സ്ഥലത്തെത്തിയ പുതുക്കാട് പൊലിസ് യുവാവിനെ കസ്റ്റഡിയില്‍ എടുക്കുകയായിരുന്നു. പ്രതിയെ സംഭവസ്ഥലത്ത് കൊണ്ടുവന്നു തെളിവെടുപ്പ് നടത്തി. പുതുക്കാട് സി.ഐ എസ്.പി സുധീരന്റെ നേതൃത്വത്തിലുള്ള സംഘമാണ് പ്രതിയെ അറസ്റ്റു ചെയ്തത്. പ്രതിയെ കോടതിയില്‍ ഹാജരാക്കി.