ദമാം: ജോലിയും ശമ്പളവുമില്ലാതെ ഒരു വര്‍ഷത്തിലേറെയായി ദുരിത കഴിഞ്ഞജീവിതം നയിച്ചിരുന്ന 140 ഓളം ഇന്ത്യക്കാര്‍ക്ക് നാട്ടിലേക്കു പോകാന്‍ വഴിയൊരുങ്ങി. കിഴക്കന്‍ പ്രവിശ്യയിലെ ജുബൈലില്‍ റോയല്‍ കമ്മീഷനിലെ നിര്‍മ്മാണ പ്രവര്‍ത്തനങ്ങള്‍ ചെയ്തിരുന്ന തൊഴിലാളികള്‍ക്കാണ് മാസങ്ങള്‍ നീണ്ട നിയമയുദ്ധത്തിനൊടുവില്‍ എക്‌സിറ്റും വിമാന ടിക്കറ്റും ലഭിച്ചത്. ഖോബാര്‍ ആസ്ഥാനമായ കമ്പനിയുടെ കീഴിലുള്ള ഇവര്‍ക്ക് എംബസിയുടെയും സന്നദ്ധ പ്രവര്‍ത്തകരുടെയും ഇടപെടലുകളാണ് തുണയായത്.

2015 ഡിസംബര്‍ മുതലാണ് 140 ഇന്ത്യക്കാരുള്‍പ്പടെ 350 തൊഴിലാളികള്‍ ജോലി ചെയ്തിരുന്ന കമ്പനിയില്‍ ശമ്പളം മുടങ്ങാന്‍ തുടങ്ങിയത്. തുടര്‍ന്ന് തൊഴിലാളികള്‍ സമരവുമായി രംഗത്തെത്തിയതോടെ മേലധികാരികള്‍ ഇടപെട്ട് രണ്ടുമാസത്തെ ശമ്പളം നല്‍കാമെന്ന് ഉറപ്പു നല്‍കി. അത് പാലിക്കപ്പെടാതെ വന്നപ്പോള്‍ കുപിതരായ തൊഴിലാളികള്‍ കമ്പനിയുടെ വെയര്‍ഹൗസില്‍ എത്തി അധികൃതരെ തടഞ്ഞുവെച്ചു. ഒടുവില്‍ പൊലീസും തൊഴില്‍ വകുപ്പ് അധികൃതരും ഇടപെട്ടു നടപടിയെടുക്കാമെന്ന് ഉറപ്പ് നല്‍കിയതിനെ തുടര്‍ന്ന് പിരിഞ്ഞു പോവുകയായിരുന്നു.

പിന്നീട് ഈ ഉറപ്പും ഫലം കാണാതെ വന്നപ്പോള്‍ തൊഴിലാളികള്‍ ഒന്നടങ്കം ഖോബാറിലുള്ള ഹെഡ് ഓഫീസില്‍ പോയി ജനറല്‍ മാനേജരെ കണ്ടിട്ടും ഫലമില്ലാതെ വന്നപ്പോഴാണ് ലേബര്‍ ഓഫീസില്‍ പരാതി നല്‍കിയത്. നിയമ യുദ്ധം നീണ്ടപ്പോള്‍ ഇവര്‍ പട്ടിണിയിലാവുകയും ഇഖാമയും ഇന്‍ഷുറന്‍സും ഇല്ലാത്തതിനാല്‍ പുറത്തിറങ്ങുവാനും ചികിത്സക്കും വരെ ബുദ്ധിമുട്ടിലായി. ഇതിനിടെ പ്രഖ്യാപിക്കപ്പെട്ട പൊതുമാപ്പില്‍ നാട്ടില്‍ പോകാനുള്ള ഒരുക്കത്തിനിടെയാണ് ടിക്കറ്റ് നല്‍കാന്‍ കമ്പനി തയ്യാറായത്. കഴിഞ്ഞ ദിവസം 36 പേര്‍ നാട്ടിലേക്ക് പോയി. അടുത്ത ദിവസം നാല് മലയാളികള്‍ ഉള്‍പ്പടെ 60 പേര്‍ കൂടി യാത്രയാകും.

ബാക്കിയുള്ളവര്‍ തുടര്‍ന്നുള്ള ദിവസങ്ങളില്‍ നാട്ടിലേക്ക് പോകും. ശമ്പള കുടിശ്ശിക ഇന്ത്യന്‍ എംബസി ഇടപെട്ടു വാങ്ങി നല്‍കുമെന്ന പ്രതീക്ഷയിലാണ് നാട്ടില്‍ പോകുന്ന തൊഴിലാളികള്‍. ഇന്ത്യന്‍ എംബസി ജീവനക്കാരന്‍ രതീഷ്, സന്നദ്ധപ്രവര്‍ത്തകരായ ഷാജി മതിലകം, ജയന്‍ തച്ചമ്പാറ, സൈഫുദീന്‍ പൊറ്റശ്ശേരി, ഷാജിദ്ദിന്‍ നിലമേല്‍ തുടങ്ങിയവരാണ് തൊഴിലാളികളെ സഹായിക്കാന്‍ രംഗത്തുണ്ടായിരുന്നത്.