ലഖ്‌നൗ: ഇന്ത്യയില്‍നിന്ന് ദാരിദ്ര്യം ഇല്ലാതാക്കാനായി കോണ്‍ഗ്രസിനെ പുറത്താക്കൂവെന്ന് പ്രധാനമന്ത്രി നരേന്ദ്രമോദി. ഇന്ത്യയില്‍നിന്ന് ദാരിദ്ര്യം ഇല്ലാതാക്കുന്നതില്‍ കോണ്‍ഗ്രസ് പരാജയപ്പെട്ടു. അതിനാല്‍ ദാരിദ്ര്യം ഇല്ലാതാക്കുന്നതിനായി എല്ലാമൂലയില്‍നിന്നും കോണ്‍ഗ്രസിനെ തുരത്തേണ്ടതുണ്ടെന്നും മോദി പറഞ്ഞു. ഉത്തര്‍പ്രദേശിലെ മീററ്റില്‍ തെരഞ്ഞെടുപ്പ് പ്രചാരണ റാലിയില്‍ സംസാരിക്കുകയായിരുന്നു അദ്ദേഹം. പാകിസ്താനിലെ മാധ്യമങ്ങള്‍ പ്രതിപക്ഷത്തെ പുകഴ്ത്തുകയാണെന്നും മോദി ആരോപിച്ചു. ഇന്ത്യയില്‍ നിന്നുള്ള നായകന്‍മാരെയാണോ പാകിസ്താനില്‍ നിന്നുള്ള നായകന്‍മാരെയാണോ നമുക്ക് വേണ്ടതെന്ന് മോദി ചോദിച്ചു. ഇന്ത്യയുടെ ശാസ്ത്രജ്ഞന്‍മാര്‍ പരീക്ഷണങ്ങള്‍ നടത്താന്‍ ആവശ്യപ്പെട്ടപ്പോഴെല്ലാം കോണ്‍ഗ്രസ് സര്‍ക്കാര്‍ അത് തടഞ്ഞുവയ്ക്കുകയായിരുന്നുവെന്നും മോദി കുറ്റപ്പെടുത്തി.

ഭൂമിയിലും ആകാശത്തും ബഹിരാകാശത്തും ഒരുപോലെ മിന്നലാക്രമണം നടത്താന്‍ തന്റെ സര്‍ക്കാര്‍ ധൈര്യം കാട്ടിയെന്നും മോദി അവകാശപ്പെട്ടു. തീരുമാനമെടുക്കാന്‍ കഴിവുള്ള സര്‍ക്കാരും അതിനു കഴിവില്ലാതിരുന്ന ഭൂതകാലവും തമ്മിലാണ് ഇപ്പോള്‍ മത്സരം. ഒരു ഭാഗത്ത് കരുത്തനായ കാവല്‍ക്കാരനും മറുഭാഗത്ത് കളങ്കിതരുടെ നീണ്ടനിരയുമാണ് നിലകൊള്ളുന്നത്.