കൊച്ചി: ജിന്‍ പേ എന്ന രണ്ടര വയസുകാരന് കൊവിഡിനെ കുറിച്ച് ഒന്നും അറിയില്ല. എന്നാല്‍ പതിനായിരം കിലോമീറ്റര്‍ അകലെയുള്ള പിതാവിന് ഏറ്റവും സന്തോഷമുണ്ടാകും ജിനിന്റെ ഹൃദയതാളം കേട്ടാല്‍. പക്ഷെ, കൊവിഡ് മഹാമാരി പൊയ്‌തൊഴിഞ്ഞാല്‍ മാത്രമെ ജിനിന് പിതാവിന്റെയടുത്തേക്ക് പറക്കാനാകൂ. 

പടിഞ്ഞാറന്‍ ആഫ്രിക്കന്‍ രാജ്യമായ ലൈബീരിയയില്‍ നിന്ന് രണ്ടര വയസുകാരന്‍ ജിന്‍ പേ മാതാവ് ജെന്നെയ്‌ക്കൊപ്പം കൊച്ചിയിലെത്തിയിട്ട് മൂന്ന് മാസം കഴിഞ്ഞു. ജിന്നിന്റെ കുഞ്ഞു ഹൃദയത്തിന് ചികിത്സ തേടിയായിരുന്നു അനേകായിരം കാതങ്ങള്‍ താണ്ടിയുള്ള യാത്ര. പീറ്റര്‍, ജെന്നെ ദമ്പതികളുടെ രണ്ടാമത്തെ മകനായ ജിനിന് ജനിച്ച് ഏതാനും നാളുകള്‍ക്കകം തന്നെ ഹൃദയത്തിന് തകരാറുണ്ടെന്ന് കണ്ടെത്തുകയായിരുന്നു. 

ശരീരഭാരം ആനുപാതികമായി വര്‍ധിക്കാത്തതും കൂടെകൂടെയുള്ള ശ്വാസകോശസംബന്ധമായ അസുഖങ്ങളുമാണ് വിശദമായ പരിശോധനകളിലേക്ക് നയിച്ചത്. വൈകാതെ തന്നെ കുഞ്ഞിന് ഹൃദയം തുറന്നുള്ള ശസ്ത്രക്രിയ വേണ്ടി വരുമെന്ന്  പീറ്ററും ജെന്നെയും മനസിലാക്കി. ഇത്തരം ഹൃദ്രോഗ ചികിത്സാസൗകര്യങ്ങള്‍ ലൈബീരിയയില്‍ ഇല്ലാത്തതിനാല്‍ തലസ്ഥാനമായ മണ്‍റോവിയയിലെ ജെ.എഫ്.കെ മെഡിക്കല്‍ സെന്ററിലെ സീനിയര്‍ പീഡിയാട്രിഷ്യനായ ഡോ.സിയ കമനോറാണ് ചികിത്സയ്ക്കായി എറണാകുളത്തെ ലിസി ആശുപത്രിയിലെ കുട്ടികളുടെ ഹൃദ്രോഗവിഭാഗം നിര്‍ദേശിച്ചത്. പീറ്ററും ജെന്നെയും  ഓവര്‍ടൈം ജോലിചെയ്തും കുടുംബവീട് പണയപ്പെടുത്തിയുമൊക്കെയാണ് യാത്രയ്ക്കും ചികിത്സയ്ക്കുമുള്ള പണം കണ്ടെത്തിയത്. 

ഒരു മാസം നീളുന്ന  വിരഹത്തിന് ശേഷം എല്ലാം കൂടുതല്‍ ശുഭകരമാകുമെന്ന പ്രതീക്ഷയിലാണ് ജെന്നെ കുട്ടിയ്‌ക്കൊപ്പം പുറപ്പെട്ടത്. പക്ഷേ കൊവിഡ് എല്ലാ കണക്കുകൂട്ടലുകളും തകര്‍ത്തു. മാര്‍ച്ച് ആറിന്  ലിസി ആശുപത്രിയില്‍ പ്രവേശിപ്പിച്ച ജിന്നിന് 12 നാണ് ഹൃദയം തുറന്നുള്ള ശസ്ത്രക്രിയ നടത്തിയത്. അയോട്ടാ പള്‍മണറി വിന്‍ഡോയില്‍ ഉണ്ടായിരുന്ന സുഷിരം ശസ്ത്രക്രിയയിലൂടെ അടയ്ക്കുകയായിരുന്നു. 

തുടര്‍പരിശോധനകള്‍ പൂര്‍ത്തിയാക്കി ഏപ്രില്‍ രണ്ടിന് മടങ്ങാനിരിക്കെയാണ് മഹാമാരിമൂലം കാര്യങ്ങളൊക്കെ കീഴ്‌മേല്‍ മറിഞ്ഞത്. ചികിത്സയ്ക്കും ഒരു മാസത്തെ ചെലവുകള്‍ക്കുമായി ജെന്നെ  കരുതിയതൊക്കെ ഇതിനോടകം തീര്‍ന്നു. ആശുപത്രി അധികൃതരുടെ കരുതലില്‍, ആശുപത്രിയില്‍ തന്നെയാണ് ഇപ്പോള്‍ അമ്മയുടെയും കുഞ്ഞിന്റെയും താമസവും ഭക്ഷണവും. കൊച്ചിയിലും ലൈബീരിയയിലുമായി വിഭജിക്കപ്പെട്ട  ഈ കുടുംബം ഉടന്‍തന്നെ ഒത്തുചേരാന്‍ കഴിയുമെന്ന പ്രതീക്ഷയിലാണ്.