മാനന്തവാടി: വള്ളിയൂര്‍ക്കാവ് ഉത്സവനഗരിയില്‍ കൃത്യനിര്‍വഹണത്തിനിടെ പൊലിസുകാരന് മര്‍ദനമേറ്റു. മാനന്തവാടി ട്രാഫിക് യൂനിറ്റിലെ എ.എസ്.ഐ നൗഷാദിനാണ് മര്‍ദനമേറ്റത്. സംഭവത്തില്‍ സഹോദരന്മാരായ കണിയാരം കാര്യവീട്ടില്‍ നിഷാന്ത് (34), നികാന്ത് (33) എന്നിവരെ അറസ്റ്റ് ചെയ്തു.
വാഹനപാര്‍ക്കിങ്ങുമായി ബന്ധപ്പെട്ട് ഇരുവിഭാഗങ്ങള്‍ തമ്മിലുണ്ടായ തര്‍ക്കത്തിനിടെ സംഭവസ്ഥലത്തെത്തിയ പൊലിസ് ഉദ്യോഗസ്ഥനെ സഹോദരന്‍മാര്‍ ചേര്‍ന്ന് മര്‍ദിച്ചതായാണ് പരാതി. തുടര്‍ന്ന് നൗഷാദ് ജില്ലാ ആശുപത്രിയില്‍ ചികിത്സ തേടി. കൃത്യനിര്‍വഹണം തടസപ്പെടുത്തിയതിനും ഉദ്യോഗസ്ഥനെ മര്‍ദിച്ചതിനും ഇവര്‍ക്കെതിരേ കേസ് രജിസ്റ്റര്‍ ചെയ്തിട്ടുണ്ട്.