പാലക്കാട്: ഭരണഘടന ഉറപ്പ് നല്‍കുന്ന മതസ്വാതന്ത്ര്യം ഇല്ലാതാക്കാന്‍ സംസ്ഥാന സര്‍ക്കാര്‍ നീക്കം നടത്തുന്നതായി ബി.ജെ.പി സംസ്ഥാന അധ്യക്ഷന്‍ കുമ്മനം രാജശേഖരന്‍. എറണാകുളം തിരുമല ദേവസ്വം ക്ഷേത്രം ഏറ്റെടുക്കാനുള്ള കൊച്ചിന്‍ ദേവസ്വം നീക്കം ഇതിന്റെ ഭാഗമാണ്. ബി.ജെ.പി സംസ്ഥാന നിര്‍വാഹക സമിതി യോഗത്തില്‍ സംസാരിക്കുകയായിരുന്നു അദ്ദേഹം. മതേതര സര്‍ക്കാര്‍ ക്ഷേത്ര ഭരണം ഏറ്റെടുക്കാന്‍ എന്തിനാണ് ശ്രമിക്കുന്നതെന്ന് വിശദീകരിക്കണം. ഇത് മതവിവേചനമാണെന്നും അദ്ദേഹം കുറ്റപ്പെടുത്തി.
മലപ്പുറം ഉപതെരഞ്ഞെടുപ്പില്‍ ഇടത് വലത് മുന്നണികള്‍ തമ്മില്‍ സൗഹൃദ മത്സരമാണ് നടന്നത്. അധികാരവും പണവും ഉപയോഗിച്ച് നടത്തിയ പ്രചാരണ കോലാഹലങ്ങള്‍ക്കിടയിലും ബി.ജെ.പിക്ക് അതിന്റെ അടിസ്ഥാന വോട്ടുകള്‍ നിലനിര്‍ത്താനായി എന്നത് നേട്ടമാണ്. അതിന് സഹായിച്ച പ്രവര്‍ത്തകര്‍ അഭിനന്ദനം അര്‍ഹിക്കുന്നവരാണ്. ഇന്ത്യയിലെ ഏറ്റവും വലിയ മുസ്‌ലിംലീഗ് കോട്ടയാണ് മലപ്പുറം. അവിടെ അവര്‍ നേടിയ വിജയത്തിന് രാഷ്ട്രീയ പ്രാധാന്യം ഇല്ല.
കേന്ദ്രാവിഷ്‌കൃത പദ്ധതികളുടെ പ്രയോജനം മലയാളികള്‍ക്ക് കിട്ടാതിരിക്കാന്‍ ഇടത് സര്‍ക്കാര്‍ മനപ്പൂര്‍വം ശ്രമിക്കുകയാണ്. ഒരു തുണ്ട് ഭൂമി പോലുമില്ലാതെ ലക്ഷക്കണക്കിന് ആള്‍ക്കാര്‍ തെരുവില്‍ അലയുമ്പോള്‍ വന്‍കിടക്കാര്‍ക്ക് അനധികൃതമായി ആയിരക്കണക്കിന് ഏക്കര്‍ ഭൂമി കയ്യേറാന്‍ ഇരു മുന്നണികളും സഹായം ചെയ്ത് കൊടുക്കുകയാണ്. ഇതിനെതിരേ ബി.ജെ.പി ശക്തമായ പ്രക്ഷോഭ പരിപാടികള്‍ക്ക് നേതൃത്വം കൊടുക്കുമെന്നും കുമ്മനം പറഞ്ഞു.
ശൂന്യതയില്‍നിന്ന് ഭരണത്തില്‍ എത്താന്‍ മണിപ്പൂരിലെ ബി.ജെ.പിക്ക് സാധിച്ചെങ്കില്‍ കേരളത്തിലും അത് സാധ്യമാണെന്ന് ദേശീയ സെക്രട്ടറി എച്ച് രാജ പറഞ്ഞു. നിര്‍വാഹക സമിതി യോഗം ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാന ജനറല്‍ സെക്രട്ടറി എം.ടി രമേശ് രാഷ്ട്രീയ പ്രമേയം അവതരിപ്പിച്ചു. ദേശീയ നിര്‍വാഹകസമിതി യോഗ തീരുമാനങ്ങള്‍ പി.കെ കൃഷ്ണദാസ് വിശദീകരിച്ചു. ദേശീയ സഹസംഘടനാ സെക്രട്ടറി ബി.എല്‍ സന്തോഷ്, കേരളത്തിന്റെ ചുമതലയുള്ള സഹപ്രഭാരി നളിന്‍ കുമാര്‍ കട്ടീല്‍ എം.പി, ഒ. രാജഗോപാല്‍ എം.എല്‍.എ, മുന്‍ സംസ്ഥാന അധ്യക്ഷന്‍മാരായ കെ.വി ശ്രീധരന്‍ മാസ്റ്റര്‍, സി.കെ പത്മനാഭന്‍, വി മുരളീധരന്‍, സംസ്ഥാന ജനറല്‍ സെക്രട്ടറിമാരായ എ.എന്‍ രാധാകൃഷ്ണന്‍, കെ. സുരേന്ദ്രന്‍, ശോഭാ സുരേന്ദ്രന്‍, സംഘടനാ സെക്രട്ടറി എം. ഗണേശ് പങ്കെടുത്തു.