കിളിമാനൂര്‍: നാട്ടുകാരെ വെല്ലുവിളിച്ച് അനധികൃത മദ്യക്കച്ചവടം നടത്തി വന്നയാളെ എക്‌സൈസ് സംഘം പിടികൂടി. പോങ്ങനാട് കീഴ്‌പേരൂര്‍ കെ.പി സദനത്തില്‍ രവീന്ദ്രന്‍ നായര്‍(57) ആണ് പിടിയിലായത്. തന്നെ ഉദ്യോഗസ്ഥര്‍ ഒന്നും ചെയ്യില്ലെന്ന് വെല്ലുവിളിച്ചായിരുന്നു ഇയാളുടെ കച്ചവടം.
പുലര്‍ച്ചെ ബാറുകള്‍ തുറക്കുന്നതിനു മുന്‍പും രാത്രി ബാറുകള്‍ അടച്ചതിനു ശേഷവുമായിരുന്നു ഇയാളുടെ കച്ചവടം. ബിവറേജസ് ഷോപ്പില്‍ നിന്നു വാങ്ങുന്ന മദ്യം കൂടിയവിലക്ക് വില്‍ക്കുകയാണ് പതിവ്.
എക്‌സൈസ് പരിശോധനക്കെത്തുമ്പോള്‍ കുറ്റിക്കാടുകള്‍ക്കിടയില്‍ മദ്യം ഒളിപ്പിച്ച ശേഷം സ്ഥലംവിടും. മുന്‍പ് പല പ്രാവിശ്യം ഇയാള്‍ ഉദ്യോഗസ്ഥരെ വെട്ടിച്ച് രക്ഷപ്പെട്ടിട്ടുണ്ട്. ഒരുദിവസം 40 മുതല്‍ 50 കുപ്പി മദ്യം വരെ ഇയാള്‍ വില്‍ക്കാറുണ്ടായിരുന്നുവെന്ന് കിളിമാനൂര്‍ എക്‌സൈസ് ഇന്‍സ്‌പെക്ടര്‍ അനില്‍ കുമാര്‍ പറഞ്ഞു.
അസി. എക്‌സൈസ് ഇന്‍സ്‌പെക്ടര്‍ എ.കെ അജയകുമാര്‍, പ്രിവന്റീവ് ഓഫിസര്‍മാരായ ഉണ്ണികൃഷ്ണന്‍, ബിജുലാല്‍, സിവില്‍ എക്‌സൈസ് ഓഫിസര്‍മാരായ സജിത്ത്, ആദര്‍ശ്, അനീഷ്, വനിതാ സിവില്‍ എക്‌സൈസ് ഓഫിസര്‍ ലിജി, പ്രിജിത എക്‌സൈസ് ഡ്രൈവര്‍ ഗിരീശന്‍ എന്നിവര്‍ ചേര്‍ന്നാണ് പ്രതിയെ പിടികൂടിയത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.