ന്യൂഡല്‍ഹി: അലിഗഡ് മുസ്‌ലിം സര്‍വകലാശാലയുടെ ന്യൂനപക്ഷ പദവി എടുത്തുകളയാന്‍ കേന്ദ്രസര്‍ക്കാര്‍ ഒരുവശത്തുകൂടി നീക്കം നടത്തുന്നതിനിടെ സര്‍വകലാശാലക്കു ഭീഷണിയുമായി എസ്.സി-എസ്.ടി കമ്മിഷന്‍. ന്യൂനപക്ഷ പദവിയുള്ള സര്‍വകലാശാലയില്‍ ദലിത് വിദ്യാര്‍ഥികള്‍ക്ക് സംവരണം നല്‍കിയില്ലെങ്കില്‍ സ്ഥാപനത്തിനുള്ള ഫണ്ട് നിര്‍ത്തിവയ്ക്കുമെന്ന് ദേശീയ പട്ടികജാതി-പട്ടികവര്‍ഗ കമ്മിഷന്‍ അധ്യക്ഷനും ബി.ജെ.പി എം.പിയുമായ രാംകുമാര്‍ കതാരിയ പറഞ്ഞു. സര്‍വകലാശാലക്കുള്ള സാമ്പത്തിക സഹായം നിര്‍ത്തിവയ്ക്കണമെന്നാവശ്യപ്പെട്ട് കേന്ദ്രമാനവവിഭവശേഷി മന്ത്രാലയത്തിനു കത്തെഴുതുമെന്നും വേണ്ടിവന്നാല്‍ വിഷയം കോടതിയിലേക്കു വലിച്ചിഴക്കുമെന്നും അദ്ദേഹം മുന്നറിയിപ്പ് നല്‍കി. അലിഗഡ് സര്‍വകലാശാലാ ഭരണസമിതിയുമായി നടത്തിയ കൂടിക്കാഴ്ചയ്ക്കു ശേഷം മാധ്യമങ്ങളുമായി സംസാരിക്കുകയായിരുന്നു അദ്ദേഹം. അലിഗഡില്‍ മുസ്‌ലിം ഇതരവിദ്യാര്‍ഥികള്‍ക്കും സംവരണം വേണമെന്ന് നേരത്തെ മുഖ്യമന്ത്രി യോഗി ആദിത്യനാഥും ആവശ്യപ്പെട്ടിരുന്നു.

സര്‍വകലാശാലയില്‍ 50 ശതമാനം സീറ്റുകള്‍ മുസ്‌ലിം വിദ്യാര്‍ഥികള്‍ക്കു നല്‍കണമെന്ന് വ്യവസ്ഥയുണ്ടെങ്കിലും അത് പലപ്പോഴും പാലിക്കാറില്ലെന്ന് അലിഗഡ് വി.സി തബസ്സും സഹാബ് പറഞ്ഞു. 1981ലെ നിയമമനുസരിച്ച് അലിഗഡ് ന്യൂനപക്ഷ പദവിയുള്ള സ്ഥാപനമാണെന്നും അദ്ദേഹം അറിയിച്ചു. 1875ല്‍ സര്‍ സയ്യിദ് അഹമ്മദ് ഖാന്‍ സ്ഥാപിച്ച മുഹമ്മദന്‍ ആംഗ്ലോ ഓറിയന്റല്‍ കോളജിന് പിന്നീട് 1920ല്‍ പാര്‍ലമെന്റ് പാസാക്കിയ നിയമപ്രകാരമാണ് കേന്ദ്രസര്‍വകലാശാല പദവി ലഭിച്ചത്. അലിഗഡിന്റെ ന്യൂനപക്ഷപദവിയെ ചോദ്യംചെയ്യുന്ന ഹരജി ഇതിനകം സുപ്രിംകോടതിയുടെ പരിഗണനയിലുണ്ട്. അലിഗഡിനെ ന്യൂനപക്ഷ സ്ഥാപനമായി കേന്ദ്രസര്‍ക്കാര്‍ കാണുന്നില്ലെന്നും ഒരുമതേതര സമൂഹത്തില്‍ ന്യൂനപക്ഷ സ്ഥാപനങ്ങള്‍ അനുവദിക്കാനാവില്ലെന്നുമാണ് നേരത്തെ കേസ് പരിഗണിക്കുന്നതിനിടെ കേന്ദ്രസര്‍ക്കാര്‍ അറിയിച്ചിരുന്നത്.