മുക്കം: ഓണ്‍ലൈന്‍ വ്യാപാര ഭീമനായ ഫ്‌ളിപ്കാര്‍ട്ടില്‍ നിന്ന് വര്‍ക്കൗട്ട് മെഷീന്‍ ഓര്‍ഡര്‍ ചെയ്ത യുവാവിന് ലഭിച്ചത് ചാണകം. മുക്കത്ത് കേബിള്‍ ടി.വി ടെക്നീഷ്യനായ മാവൂര്‍ സ്വദേശിയായ രാഹുലാണ് കബളിപ്പിക്കപ്പെട്ടത്. ജൂണ്‍ മൂന്നിനാണ് ഫ്‌ളിപ്കാര്‍ട്ടില്‍ നിന്ന് രാഹുല്‍ എ.ബി വീല്‍ റോളര്‍ എന്ന വര്‍ക്ക് ഔട്ട് മെഷീന്‍ ഓര്‍ഡര്‍ ചെയ്തത്.
ഇന്നലെ മുക്കത്തെ ഫ്‌ളിപ്കാര്‍ട്ട് ഷോറൂമില്‍ നിന്നും സാധനം കൈപ്പറ്റി സംശയം തോന്നിയതിനെ തുടര്‍ന്ന് തുറന്നുനോക്കിയപ്പോഴാണ് പാക്കിനുള്ളില്‍ ചാണകം നിറച്ചതാണെന്ന് തിരിച്ചറിഞ്ഞത്.

399 രൂപക്കാണ് രാഹുല്‍ മെഷീന്‍ ബുക്ക് ചെയ്തത്. ക്യാഷ് ഓണ്‍ ഡെലിവറിയായി 484 രൂപ നല്‍കിയാണ് കൈപ്പറ്റിയത്. ന്യൂഡല്‍ഹിയില്‍ നിന്നാണ് സാധനം അയച്ചതെന്ന് കവറില്‍ സൂചിപ്പിക്കുന്നുണ്ട്. നിരവധി ഉപഭോക്താക്കള്‍ ആശ്രയിക്കുന്ന ഓണ്‍ലൈന്‍ വ്യാപാരത്തിന്റെ വിശ്വാസ്യത തകര്‍ക്കുന്ന ഇത്തരം അനുഭവം ഇനി ആര്‍ക്കും ഉണ്ടാകരുതെന്നും ഇതിനെതിരെ നിയമപരമായി മുന്നോട്ടുപോകുമെന്നും ഉല്‍പ്പന്നത്തിന്റെ പണം റീഫണ്ട് ചെയ്തു തരാമെന്ന് ബന്ധപ്പെട്ടവര്‍ അറിയിച്ചതായും രാഹുല്‍ പറഞ്ഞു. അതേസമയം ഓണ്‍ലൈന്‍ വ്യാപാര മേഖലയില്‍ കബളിപ്പിക്കപ്പെടാനുള്ള സാധ്യത കൂടുതലാണെന്ന് മുക്കത്തെ വ്യാപാരികള്‍ പറഞ്ഞു.