ന്യൂഡല്‍ഹി: മുഖ്യമന്ത്രി പിണറായി വിജയന്‍ ഉള്‍പ്പെടെയുള്ളവര്‍ ആരോപണവിധേയരായ എസ്.എന്‍.സി ലാവലിന്‍ അഴിമതിക്കേസ് പരിഗണിക്കുന്നത് സുപ്രിംകോടതി വീണ്ടും മാറ്റിവച്ചു. ജസ്റ്റിസുമാരായ എന്‍.വി രമണയും അബ്ദുല്‍ നസീറും അടങ്ങുന്ന ബെഞ്ച് ഇന്നലെ കേസ് പരിഗണിച്ചെങ്കിലും സി.ബി.ഐയും എതിര്‍കക്ഷികളും സത്യവാങ്മൂലം സമര്‍പ്പിക്കാന്‍ കൂടുതല്‍ സമയം ആവശ്യപ്പെട്ടതിനെ തുടര്‍ന്ന് നാലാഴ്ചത്തേക്ക് മാറ്റിയ്ക്കുകയായിരുന്നു. 

പിണറായി അടക്കമുള്ള മൂന്നു പ്രതികളെ കുറ്റവിമുക്തരാക്കിയ ഹൈക്കോടതി വിധിക്കെതിരായി സി.ബി.ഐ നല്‍കിയ ഹരജിയാണ് ഈ വിഷയത്തില്‍ രണ്ടംഗ ബെഞ്ച് മുമ്പാകെയുള്ള കേസ്. കേസില്‍ കുറ്റക്കാരാണെന്നു ഹൈക്കോടതി കണ്ടെത്തിയത്.
കെ.എസ്.ഇ.ബി മുന്‍ ഉദ്യോഗസ്ഥരായ ആര്‍. ശിവദാസന്‍, കസ്തൂരിരംഗ അയ്യര്‍ എന്നിവര്‍ ശിക്ഷ റദ്ദാക്കണമെന്ന് ആവശ്യപ്പെട്ട് നല്‍കിയ ഹരജിയും ബെഞ്ചിന്റെ പരിഗണനയിലാണ്. എല്ലാ ഹര്‍ജികളും ഒന്നിച്ചാണ് കോടതി പരിഗണിക്കുന്നത്.