പന്തീരാങ്കാവ്: ഒളവണ്ണ പഞ്ചായത്തിന്റെയും ആരോഗ്യ വകുപ്പിന്റെയും സംയുക്ത പരിശോധനയില്‍ വൃത്തിഹീനമായ സാഹചര്യത്തില്‍ കണ്ടെത്തിയ സ്ഥാപനം അടച്ചു പൂട്ടി. ഒളവണ്ണ ജംങ്ഷനു സമീപം പ്രവര്‍ത്തിക്കുന്ന അച്ചാര്‍, സ്‌ക്വാഷ്, ജാം തുടങ്ങിയവ നിര്‍മിച്ച് വിപണനം നടത്തുന്ന സ്ഥാപനത്തിനാണ് താഴ് വീണത്.
വര്‍ഷങ്ങളോളം പഴക്കമുള്ളതും പുഴുവരിച്ച നിലയിലുള്ളതുമായ അച്ചാറുകളും ജാമുകളും നിറച്ച കണ്ടെയ്‌നറുകളും പാക്കിങ് കഴിഞ്ഞിട്ടും തിയതി രേഖപ്പെടുത്താതെ സൂക്ഷിച്ച നിരവധി ഉല്‍പന്നങ്ങളും കാലഹരണപ്പെട്ട നിലയിലുള്ള ഉപ്പിന്റെ വലിയ ശേഖരവും സ്ഥാപനത്തില്‍ കണ്ടെത്തിയതായി ഒളവണ്ണ ഹെല്‍ത്ത് ഇന്‍സ്‌പെക്ടര്‍ എ.കെ അജയകുമാര്‍ പറഞ്ഞു. വിദഗ്ദ പരിശോധനകള്‍ക്കായി ജില്ലാ മെഡിക്കല്‍ ടെക്‌നിക്കല്‍ അസിസ്റ്റന്റ്, ജില്ലാ മെഡിക്കല്‍ ഓഫിസര്‍ എന്നിവര്‍ പരിശോധന നടത്തുമെന്നും ഫുഡ് സേഫ്റ്റി വിഭാഗം ഉല്‍പന്നങ്ങളുടെ സാമ്പിളുകള്‍ പരിശോധനക്കായി ശേഖരിക്കുമെന്നും ആരോഗ്യ വകുപ്പ് അധികൃതര്‍ പറഞ്ഞു. ഹെല്‍ത്ത് ഇന്‍സ്‌പെക്ടറോടൊപ്പം ഗ്രാമ പഞ്ചായത്ത് സെക്രട്ടറി അനില്‍കുമാര്‍ തിരുത്തിയില്‍, ജെ.എച്ച്.ഐമാരായ അലി, ബ്രിജിത്ത് എന്നിവരും പരിശോധനകള്‍ക്ക് നേതൃത്വം നല്‍കി.