ചാലക്കുടി: മേല്‍ പാലത്തിനടിയില്‍ പാര്‍ക്ക് ചെയ്തിരുന്ന ബൈക്ക് മോഷ്ടിച്ചു കൊണ്ടു പോയ ആളെ ചാലക്കുടി പൊലിസ് പിടികൂടി. കാസര്‍കോട് കുമ്പള സ്വദേശി ബാവ കോര്‍ട്ടേഴ്‌സില്‍ താമസിക്കുന്ന അബ്ദുല്‍ സമദ് (22) നെയാണ് ചാലക്കുടി സര്‍ക്കിള്‍ ഇന്‍സ്‌പെക്ടര്‍ ജെ. മാത്യു, സബ് ഇന്‍സ്‌പെക്ടര്‍ കെ.വി സുധീഷ് കുമാര്‍ എന്നിവര്‍ ചേര്‍ന്ന് പിടികൂടിയത്.
എലിഞ്ഞിപ്ര സ്വദേശി ശ്രീരാജിന്റെ ബൈക്ക് മോഷ്ടിച്ച കേസിലാണ് അറസ്റ്റ്. പാലത്തിനടിയില്‍ ബൈക്ക് വച്ച ശേഷം കോളജില്‍ പോയ ശ്രീരാജ് തിരിച്ചുവന്ന സമയത്ത് ബൈക്ക് കാണാതാവുകയായിരുന്നു.
ജീന്‍സ് പാന്റും മെറൂണ്‍ കളര്‍ ബനിയനും ധരിച്ച ഒരാള്‍ തന്റെ ബൈക്ക് ഓടിച്ചു പോകുന്നതായി ശ്രീരാജ് കാണുകയും ഉടനെ തന്നെ ചാലക്കുടി പൊലിസിനെ വിവരം അറിയിക്കുകയും ചെയ്തു. തുടര്‍ന്ന് ചാലക്കുടി കോടതി ജങ്ഷന്‍ പരിസരത്ത് വച്ച് പ്രതിയെ പിടികൂടുകയായിരുന്നു.
ബൈക്ക് മോഷ്ടിക്കുകയും ഇതിന്റെ എന്‍ജിന്‍ പൊളിച്ചെടുത്ത് ആവശ്യക്കാര്‍ക്ക് വില്‍ക്കുകയാണ് ചെയ്യുന്നതെന്ന് പ്രതി പൊലിസിനോട് പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു. എ.എസ്.ഐ ഉണ്ണികൃഷ്ണന്‍, സീനിയര്‍ സി.പി.ഒമാരായ സുമേഷ്, ടി.എ ജെയ്‌സണ്‍ സി.പിഒമാരായ രാജേഷ് ചന്ദ്രന്‍, പി.വി രൂപേഷ് , വിജയകുമാര്‍, വനിതാ സിവില്‍ പൊലിസ് ഓഫിസര്‍ ഷീബ അശോകന്‍ എന്നിവര്‍ പ്രതിയെ പിടികൂടുന്ന സംഘത്തില്‍ ഉണ്ടായിരുന്നു.