അന്തിക്കാട്: പൊരിവെലിയില്‍ താമരച്ചെടികള്‍ വ്യാപകമായി കരിഞ്ഞുണങ്ങുന്നത് കര്‍ഷകരെ ആശങ്കയിലാക്കുന്നു. കൃഷിക്ക് അനുയോജ്യമല്ലാത്ത അന്തിക്കാട്, പുള്ള്, ആലപ്പാട്, ചാഴൂര്‍ കോള്‍ പടവുകളില്‍ ഏക്കര്‍ കണക്കിനു സ്ഥലത്ത് കര്‍ഷകര്‍ താമരപ്പൂ കൃഷിയിറക്കിയിട്ടുണ്ട്.
എന്നാല്‍ ചൂട് ശക്തിയായതോടെ ഏക്കര്‍ കണക്കിനു നിലത്തിലെ താമരച്ചെടികള്‍ വ്യാപകമായി കരിഞ്ഞുണങ്ങുന്നതാണ് കര്‍ഷകരെ പ്രതിസന്ധിയിലാക്കുന്നത്. താമരയുള്ള പാടങ്ങളില്‍ വെള്ളമുണ്ടെങ്കിലും ഇലകള്‍ കരിഞ്ഞുണങ്ങുകയാണ്. തുടര്‍ന്ന് പൂക്കളും മൊട്ടുകളും നശിക്കും.
താമരകൃഷിയില്‍ നൂറുമേനി പ്രതീക്ഷിച്ച കര്‍ഷകര്‍ക്ക് ഇത് വന്‍ തിരിച്ചടിയായി. ജില്ലയിലെ വിവിധ ക്ഷേത്രങ്ങളിലേക്ക് ദിവസവും ആയിരകണക്കിന് പൂക്കളാണ് കോള്‍പടവുകളില്‍നിന്ന് കൊണ്ടു പോയിരുന്നത്.
എന്നാല്‍ ചൂട് കനത്തതോടെ ദിവസവും നൂറില്‍ താഴെ പൂക്കളാണ് ലഭിക്കുന്നതെന്ന് കര്‍ഷകര്‍ പറഞ്ഞു. താമരക്ക് ആവശ്യക്കാര്‍ ഏറെയുണ്ടെങ്കിലും കടുത്ത വേനല്‍ ചതിച്ചുവെന്നും താമരകൃഷിയില്‍ ഇത്രയും വലിയ നഷ്ടം ഇതാദ്യമാണെന്നും കര്‍ഷകര്‍ അഭിപ്രായപ്പെട്ടു.
ഗുരുവായൂര്‍, ഇരിങ്ങാലക്കുട തുടങ്ങി പ്രശസ്തമായ ക്ഷേത്രങ്ങളിലേക്ക് കോള്‍പാടങ്ങളില്‍ നിന്നാണ് താമര കൊണ്ടു പോകുന്നത്. ദൂരെ സ്ഥലങ്ങളിലേക്ക് മൊട്ടുകളായാണ് കൊണ്ടു പോകുക. കപ്പലണ്ടി പിണ്ണാക്ക്, ചാണകം എന്നിവയാണു വളം. കൃഷിക്ക് ആവശ്യമായ വെള്ളം കോള്‍പടവുകളില്‍ നിന്നു തന്നെ ലഭിക്കും.
താമരപ്പൂ കൃഷി ചെയ്ത് ഉപജീവനം നടത്തുന്ന നിരവധി കര്‍ഷകര്‍ ചാഴൂര്‍, അന്തിക്കാട് മേഖലയിലുണ്ട്. കനത്ത ചൂടില്‍ താമരച്ചെടികള്‍ കരിഞ്ഞുണങ്ങുന്നത് ഇവര്‍ക്ക് തിരിച്ചടിയായിട്ടുണ്ട്.
പുഷ്പ കൃഷിയില്‍ നാശം സംഭവിച്ചവര്‍ക്ക് അടിയന്തര സഹായം നല്‍കണമെന്ന് കര്‍ഷകര്‍ ആവശ്യപ്പെട്ടു.