ഇരിട്ടി: സ്‌കൂള്‍ വിദ്യാര്‍ഥികളെ ലക്ഷ്യമിട്ട് പാന്‍മസാല വില്‍പ്പനയ്ക്കായി സ്‌കൂള്‍ പരിസരത്തെത്തിയ കൂത്തുപറമ്പ് സ്വദേശിയായ മധ്യവയസ്‌കനെ ഇരിട്ടി പൊലിസ് അറസ്റ്റ് ചെയ്തു.
ഇന്നലെ രാവിലെ ഇരിട്ടിക്കടുത്ത് കീഴൂര്‍ വി.യു.പി സ്‌കൂള്‍ പരിസരത്തു വച്ചാണ് കൂത്തുപറമ്പ് നീര്‍വേലിയില്‍ അലിമാസ് മന്‍സിലില്‍ പി.എം ഷറഫുദ്ധീന്‍ (53) എന്നയാളെ ഇരിട്ടി എസ്.ഐ പി.എം സുനില്‍കുമാര്‍, എ.എസ്.ഐ കെ.പി സതീശന്‍, സി.പി.ഒ പ്രിയേഷ് എന്നിവര്‍ ചേര്‍ന്ന് പിടികൂടിയത്. ഇയാളില്‍നിന്ന് വില്‍പ്പനയ്ക്കായി എത്തിച്ച 250 പായ്ക്കറ്റ് പാന്‍മസാലകള്‍ പിടിച്ചെടുത്തു.
മട്ടന്നൂര്‍ കോടതിയില്‍ ഹാജരാക്കിയ പ്രതിയെ 14 ദിവസത്തേയ്ക്ക് റിമാന്‍ഡ് ചെയ്തു. സ്‌കൂളുകള്‍ കേന്ദ്രീകരിച്ച് വ്യാപകമായി വിദ്യാര്‍ഥികള്‍ക്ക് പാന്‍മസാലകളും ലഹരി ഗുളികകളും വില്‍പ്പന നടത്തുന്നുണ്ടെന്ന സ്‌കൂള്‍ പി.ടി.എയുടെയും അധ്യാപകരുടെയും നാട്ടുകാരുടെയും പരാതിയില്‍ കഴിഞ്ഞ വര്‍ഷം പാന്‍മസാലകളും ലഹരി വസ്തുക്കളും വില്‍പ്പന നടത്തിയ ചില വ്യാപാരികള്‍ ഉള്‍പ്പെടെ നാലുപേരെ ഇരിട്ടി പൊലിസ് പിടികൂടിയിരുന്നു.