കൊച്ചി: മുനമ്പം ഹാര്‍ബര്‍ കേന്ദ്രീകരിച്ച് മത്സ്യബന്ധനത്തിന് എത്തിയ മത്സ്യത്തൊഴിലാളികള്‍ തമിഴ്‌നാട്ടുകാരല്ലെന്നും തിരുവനന്തപുരം പൊഴിയൂര്‍ സ്വദേശികളാണെന്നും മുനമ്പത്തെ തരകന്മാര്‍ വാര്‍ത്താസമ്മേളനത്തില്‍ അറിയിച്ചു. ഒരു വഞ്ചിയില്‍ 5 മത്സ്യത്തൊഴിലാളികളെന്ന കണക്കില്‍ 30 വഞ്ചികളില്‍ 150 തൊഴിലാളികളാണ് പൊഴിയൂരില്‍നിന്ന് എത്തിയത്. ഇവര്‍ ലോക്ക്ഡൗണിനു മുമ്പ് മാര്‍ച്ച് 20ന് ഹാര്‍ബറില്‍ വഞ്ചി വച്ചാണ് നാടുകളിലേക്ക് പോയത്. ലോക്ക്ഡൗണില്‍ ഇളവു വന്നതിനു ശേഷം ജൂണ്‍ 2ന് ട്രാന്‍സ്‌പോര്‍ട്ട് ബസുകളിലും തരകന്മാര്‍ ഏര്‍പ്പാടാക്കിയ വാഹനങ്ങളിലുമാണ് മുനമ്പത്തെത്തിയത്.
വഞ്ചികളുടെ അറ്റകുറ്റ പണികള്‍ക്കു ശേഷം ജൂണ്‍ 9 മുതലാണ് ജോലിക്ക് പോയിത്തുടങ്ങിയത്. എന്നാല്‍ ഇവര്‍ കടല്‍മാര്‍ഗം ഒളിച്ചെത്തിയ തമിഴ്‌നാട്ടുകാരെന്ന തരത്തിലാണ് വാര്‍ത്ത പരന്നത്. ഇതോടെ 13ന് ഫിഷറീസ് വകുപ്പില്‍നിന്ന് അധികൃതരെത്തി 24 മണിക്കൂറിനകം തിരികെ പോകാന്‍ ആവശ്യപ്പെട്ടു.
കലക്ടറുടെ ഉത്തരവു പ്രകാരമാണെന്ന് പറഞ്ഞെങ്കിലും അന്വേഷണത്തില്‍ അത്തരമൊരു ഉത്തരവ് കലക്ടര്‍ നല്‍കിയിട്ടില്ലെന്ന് അറിഞ്ഞു. മറ്റെല്ലാ ജില്ലകളിലും അന്യജില്ലകളിലെ മത്സ്യത്തൊഴിലാളികള്‍ ജോലി ചെയ്യുന്നുണ്ട്. എറണാകുളത്ത് മാത്രമാണ് ഇത്തരത്തില്‍ പ്രശ്‌നമുണ്ടായത്. നിലവില്‍ ഈ മത്സ്യത്തൊഴിലാളികള്‍ക്ക് ഹാര്‍ബറിന് പുറത്തിറങ്ങാന്‍ കഴിയാത്ത അവസ്ഥയാണ്. നാട്ടുകാര്‍ ഭയത്താല്‍ ഇവര്‍ക്കെതിരെ തിരിഞ്ഞിരിക്കുകയാണെന്നും തരകന്മാര്‍ ആരോപിച്ചു. വാര്‍ത്താസമ്മേളനത്തില്‍ അമല്‍ദേവ്, സരീഷ്, ബാബു കിഴക്കേവീട്ടില്‍, പ്രദീപ് മങ്ങാട് എന്നിവര്‍ പങ്കെടുത്തു.