കൊണ്ടോട്ടി: നെടിയിരുപ്പ്, കൊണ്ടോട്ടി പഞ്ചായത്തുകള്‍ കൂട്ടിച്ചേര്‍ത്ത് രൂപീകരിച്ച കൊണ്ടോട്ടി നഗരസഭയില്‍ നഗരസഭ ഉദ്യോഗസ്ഥരെ നിയമിച്ചു തുടങ്ങി.സെക്രട്ടറി ഉള്‍പ്പടെയുചറച ജീവനക്കാരെയാണ് നഗരസഭയില്‍ നിയമിച്ചു തുടങ്ങിയത്.
കൊണ്ടോട്ടി, നെടിയിരുപ്പ് പഞ്ചായത്തുകള്‍ കൂട്ടിച്ചേര്‍ത്താണ് നഗരസഭയുണ്ടാക്കിയതെങ്കിലും പഞ്ചായത്ത് ജീവനക്കാരായിരുന്നു നഗരസഭയില്‍ ജോലി ചെയ്തിരുന്നത്. എന്നാല്‍ കൊണ്ടോട്ടിക്കൊപ്പം ജില്ലയില്‍ നിലവില്‍ വന്ന വളാഞ്ചേരി, പരപ്പനങ്ങാടി, തിരൂരങ്ങാടി നഗരസഭകളിലെല്ലാം പുതിയ സെക്രട്ടറിയെയടക്കം നിയമിച്ച് നഗരസഭ തലത്തിലേക്ക് എത്തിച്ചെങ്കിലും കൊണ്ടോട്ടി നഗരസഭയില്‍ ജീവനക്കാരില്ലാത്ത അവസ്ഥയായിരുന്നു.
സി.പി.എമ്മിന് ഭരണപങ്കാളിത്തമുണ്ടായിട്ടും നഗരസഭയോടുള്ള സംസ്ഥാനസര്‍ക്കാറിന്റെ അവഗണന തുടരുന്നതിനെതിരെ പ്രതിഷേധവുമുയര്‍ന്നിരുന്നു. സംസ്ഥാനത്ത് 14 നഗരസഭകളിലും പുതുതായി സെക്രട്ടറിമാരെ നിയമിച്ചെങ്കിലും കൊണ്ടോട്ടി നഗരസഭയില്‍ മാത്രം സെക്രട്ടറിയെ നിയമിക്കാനായിരുന്നില്ല.
ജനസംഖ്യയിലും വിസ്തൃതിയില്‍ ഏറെ മുന്‍പന്തിയിലുള്ള നഗരസഭയാണ് കൊണ്ടോട്ടി. വിവിധ ആവശ്യങ്ങള്‍ക്കായി നഗരസഭയെ സമീപിക്കുന്നവര്‍ക്ക് ജീവനക്കാരില്ലാത്തതിനാല്‍ പലതവണ കയറി ഇറങ്ങേണ്ട അവസ്ഥയാണുളളത്. ജീവനക്കാര്‍ എത്തി തുടങ്ങിയതോടെ നിലവിലെ പ്രശ്‌നങ്ങള്‍ അറുതിയായി.കോണ്‍ഗ്രസും ഇടതുപക്ഷവും ചേര്‍ന്നാണ് നഗരസഭ ഭരിക്കുന്നത്. നിലവില്‍ അധ്യക്ഷസ്ഥാനം കോണ്‍ഗ്രിനാണ്. വൈകാതെ ചെയര്‍മാന്‍ സ്ഥാനം സി.പി.എം ഏറ്റെടുക്കും.