കാഞ്ഞങ്ങാട്: ജില്ലയില്‍ വ്യാപകമായിക്കൊണ്ടിരിക്കുന്ന കഞ്ചാവ്, മദ്യ-മയക്കുമരുന്ന് സംഘത്തിനെതിരേ പൊലിസ് കര്‍ശനടപടിക്കൊരുങ്ങുന്നു. ഇതിന്റെ ഭാഗമായി ജില്ലാ പൊലിസ് മേധാവി ഡോ.ശ്രീനിവാസന്റെ നിര്‍ദേശത്തെ തുടര്‍ന്ന് പൊലിസ് വിവിധ സ്ഥലങ്ങളില്‍ മിന്നല്‍പരിശോധന നടത്തി. പടന്നക്കാട്, ഒഴിഞ്ഞവളപ്പ്, കല്ലൂരാവി, കാഞ്ഞങ്ങാട്, മീനാപ്പീസ് കടപ്പുറം, ആവിക്കര, റെയില്‍വേ സ്റ്റേഷന്‍ പരിസരം, നഗരത്തിലെ നയാബസാര്‍ തുടങ്ങിയ സ്ഥലങ്ങളിലാണ് മിന്നല്‍പരിശോധന നടത്തിയത്.
പരിശോധനക്കിടയില്‍ കാഞ്ഞങ്ങാട് റെയില്‍വേ സ്റ്റേഷനു സമീപം സംശയകരമായ സാഹചര്യത്തില്‍ കാണപ്പെട്ട രണ്ടു യുവാക്കളെ പൊലിസ് മുന്‍കരുതലായി അറസ്റ്റ് ചെയ്തു.
ഇട്ടമ്മല്‍ ക്വാര്‍ട്ടേഴ്‌സിലെ കെ. എ മുഹമ്മദ് നൗഷാദ് (21), കാഞ്ഞിരപൊയില്‍ കയ്യുള്ളകൊച്ചിയിലെ ഷുഹൈബ് റഹിമാന്‍ (23) എന്നിവരാണ് അറസ്റ്റിലായത്.