തിരുവനന്തപുരം: നാട്ടങ്കത്തില്‍ സാറ്റ് തിരൂരിനെ തലയ്ക്കടിച്ചു വീഴ്ത്തി ഏജീസിന് വിജയം. കേരള പ്രീമിയര്‍ ലീഗ് ഫുട്‌ബോളില്‍ 2-1 നാണ് ഏജീസ് സാറ്റിനെ കീഴടക്കിയത്. ആദ്യ പകുതിയില്‍ ഒരു ഗോളിന് പിന്നിട്ടു നിന്ന ശേഷമായിരുന്നു ഏജീസിന്റെ തിരിച്ചുവരവ്. 66 ാം മിനുട്ടില്‍ നസറദ്ദീനും 92 ാം മിനുട്ടില്‍ വൈ ഡാനിയുമാണ് ഏജീസിന് വേണ്ടി ഗോള്‍ നേടിയത്. 24 ാം മിനുട്ടില്‍ ഷഹീദിന്റെ വകയായിരുന്നു സാറ്റിന്റെ ഗോള്‍. ഏജീസിന്റെ ഹോം ഗ്രൗണ്ടായ യൂനിവേഴ്‌സിറ്റി സ്റ്റേഡിയത്തില്‍ ആക്രമണത്തോടെയാണ് ഇരുടീമുകളും പോരാട്ടം തുടങ്ങിയത്. മുന്‍തൂക്കം തിരൂര്‍ സാറ്റിനായിരുന്നു. കുറിയ പാസുകളുമായി ഏജീസ് ഗോള്‍ മുഖം സാറ്റ് ആക്രമിച്ചു.
അതിന്റെ ഫലം 24 ാം മിനുട്ടില്‍ ഗോളിന്റെ രൂപത്തില്‍ എത്തി. സാറ്റിന്റെ മുഹമ്മദ് ഇര്‍ഷാദ് വലത് വശത്തുകൂടി ഗോള്‍ പോസ്റ്റ് ലക്ഷ്യമാക്കി തൊടുത്ത ഷോട്ട് ഏജീസ് പ്രതിരോധം ക്ലിയര്‍ ചെയ്‌തെങ്കിലും മൈനസ് പാസായി. പ്രതിരോധത്തിലെ പിഴവ് മുതലെടുത്ത് പന്തു പിടിച്ചെടുത്ത ഷഹീദ് തൊടുത്ത ഷോട്ട് വലയിലേക്ക് പറന്നിറങ്ങി. ഏജീസ് ഗോളി എസ് ശ്രീജുവിന് കാഴ്ചക്കാരനാകാനേ കഴിഞ്ഞുള്ളൂ.
38 ാം മിനുട്ടില്‍ സാറ്റ് താരം മുഹമ്മദ് സാലിഹ് തൊടുത്ത ലോങ് റേഞ്ചര്‍ ഏജീസ് ഗോളി തടഞ്ഞു. ആദ്യ പകുതിയുടെ അവസാന നിമിഷങ്ങളിലും അധിക സമയത്തും ഇരുടീമുകളും ഗോളിനായി ആക്രമിച്ച് കളിച്ചെങ്കിലും ഫലം കണ്ടില്ല. രണ്ടാം പകുതിയുടെ തുടക്കത്തില്‍ ഇരു ടീമുകളും മാറ്റം വരുത്തി.
ഏജീസ് കിരണ്‍ദാസിനെ പിന്‍വലിച്ച് മിഥുന്‍ വില്‍വെറ്റിനെയും സാറ്റ് ഷറഫുദ്ദീനെ പിന്‍വലിച്ച് മന്‍സൂറിനെയും കളത്തിലിറക്കി. 66 ാം മിനുട്ടില്‍ ഹെഡ്ഡറിലൂടെ ഏജീസ് സമനില പിടിച്ചു. ഇടത് വിങില്‍ നിന്നും ഏജീസ് താരം മിഥുന്‍ ഉയര്‍ത്തി നല്‍കിയ ക്രോസ് നസറുദ്ദീന്‍ കൃത്യമായി ഗോള്‍ വലയിലേക്ക് ഹെഡ്ഡു ചെയ്തിട്ടു.
92 ാം മിനുട്ടില്‍ ഇടത് വശത്തു നിന്നും ജിപ്‌സണ്‍ ജസ്റ്റസ് തൊടുത്ത കിക്ക് കൃത്യതയോടെ ഡാനി സാറ്റ് വലയിലേക്ക് ഹെഡ്ഡു ചെയ്തു. ഗോള്‍ വലയുടെ വലത് മൂലയിലേക്ക് താഴ്ന്നിറങ്ങിയ പന്ത് തടുക്കാന്‍ ഗോളി ഭാസ്‌കര്‍ റോയിക്കായില്ല. സമനിലക്കായി സാറ്റ് കിണഞ്ഞു ശ്രമിച്ചെങ്കിലും വിജയം ഏജീസിന് ഒപ്പം നിന്നു.
കേരള പൊലിസിന് ആദ്യ ജയം
കൊച്ചി: കേരള പ്രീമിയര്‍ ലീഗില്‍ കേരള പൊലിസിന് ആദ്യ ജയം. കൊച്ചി അംബേദ്കര്‍ സ്റ്റേഡിയത്തില്‍ നടന്ന പോരാട്ടത്തില്‍ സെന്‍ട്രല്‍ എക്‌സൈസിനെ മറുപടിയില്ലാത്ത രണ്ട് ഗോളുകള്‍ക്കാണ് പൊലിസ് പരാജയപ്പെടുത്തിയത്.
കളിയുടെ 17 ാം മിനുറ്റില്‍ ജിംഷാദും 46 ാം മിനുറ്റില്‍ ഫിറോസും പൊലിസിനായി ഗോള്‍ നേടി. ടീമിന്റെ ആദ്യ വിജയമാണിത്. ആദ്യ കളിയില്‍ എഫ്.സി തൃശൂരിനോടാണ് പൊലിസ് ടീം പരാജയപ്പെട്ടത്. സെന്‍ട്രല്‍ എക്‌സൈസിന്റെ തുടര്‍ച്ചയായ രണ്ടാം പരാജയമാണിത്.