കാസര്‍കോട്: തകര്‍ന്ന റോഡുകള്‍ അറ്റകുറ്റപ്പണി നടത്തി നന്നാക്കാത്തതില്‍ പ്രതിഷേധിച്ച് കാസര്‍കോട്ട് സ്വകാര്യബസുകള്‍ അനിശ്ചിതകാലസമരത്തിലേക്ക്. സമരത്തിന്റെ ആദ്യഘട്ടമെന്ന നിലയില്‍ വിദ്യാനഗര്‍ സീതാംഗോളി റൂട്ടില്‍ നാളെ മുതല്‍ ബസ് സര്‍വിസ് നിര്‍ത്തിവെക്കും. അന്നു മുതല്‍ കാസര്‍കോട് പുതിയ ബസ് സ്റ്റാന്റ് ബഹിഷ്‌ക്കരിക്കുമെന്നും കേരള സ്റ്റേറ്റ് പ്രൈവറ്റ് ബസ് ഓപ്പറേറ്റേര്‍സ് ഫെഡറേഷന്‍ കാസര്‍കോട് താലൂക്ക് കമ്മിറ്റി വ്യക്തമാക്കി.
കടുത്ത സാമ്പത്തിക നഷ്ടം സഹിച്ചാണ് ഇപ്പോള്‍ സര്‍വിസ് നടത്തുന്നതെന്ന് ബസുടമകള്‍ പറഞ്ഞു. താല്‍ക്കാലികമായെങ്കിലും ബസ് സര്‍വിസ് നടത്താന്‍ ഉതകുന്ന തരത്തില്‍ റോഡില്‍ അറ്റകുറ്റപ്പണികള്‍ നടത്തുമെന്ന പ്രതീക്ഷയിലാണ് ഇതുവരെ ബസ് സര്‍വിസ് നടത്തിയതെന്നും കനത്ത നഷ്ടം സഹിച്ച് ഇനി സര്‍വിസ് നടത്താനാകില്ലെന്നും ബസുടമകള്‍ വാര്‍ത്താ സമ്മേളനത്തില്‍ അറിയിച്ചു. വാര്‍ത്താസമ്മേളനത്തില്‍ എന്‍.എം ഹസൈനാര്‍ ഹാജി, പി.എ മുഹമ്മദ് കുഞ്ഞി, രാധാകൃഷ്ണ സുറു, കെ ഗിരീഷ്, താരാനാഥ് മധൂര്‍ എന്നിവര്‍ സംബന്ധിച്ചു.