ഭുവനേശ്വര്‍: ചെന്നൈയിന്‍ എഫ്.സി സൂപ്പര്‍ കപ്പിന്റെ ക്വാര്‍ട്ടറില്‍ പ്രവേശിച്ചു. ഇന്നലെ നടന്ന മത്സരത്തില്‍ മുംബൈ സിറ്റിയെ എതിരില്ലാത്ത രണ്ട് ഗോളുകള്‍ക്കാണ് പരാജയപ്പെടുത്തിയത്. 42-ാം മിനുട്ടില്‍ മലയാളി താരം സി.കെ വിനീതും 43-ാം മിനുട്ടില്‍ ജെജെയുമാണ് ചെന്നൈയിന് വേണ്ടി ഗോള്‍ കണ്ടെത്തിയത്. താരതമ്യേന കരുത്ത് കുറഞ്ഞ മുംബൈക്കെതിരേ മികച്ച പ്രകടനമാണ് ചെന്നൈ കാഴ്ചവച്ചത്. ഇന്ന് വൈകിട്ട് 5.30ന് നടക്കുന്ന മത്സരത്തില്‍ ഇന്ത്യന്‍ ആരോസ് എഫ്.സി ഗോവയെ നേരിടും. ആദ്യ മത്സരത്തില്‍ കേരള ബ്ലാസ്റ്റേഴ്‌സിനെ ഇന്ത്യന്‍ ആരോസ് എതിരില്ലാത്ത രണ്ട് ഗോളുകള്‍ക്ക് പരാജയപ്പെടുത്തിയിരുന്നു.