ക്വലാലംപുര്‍: അസ്‌ലന്‍ ഷാ കപ്പ് ഹോക്കിയില്‍ ഇന്ത്യയുടെ ഗോള്‍ വര്‍ഷം തുടരുന്നു. ഇന്നലെ നടന്ന ഗ്രൂപ്പ് ഘട്ടത്തിലെ അവസാന മത്സരത്തില്‍ പോള@ണ്ടിനെ ഏകപക്ഷീയമായ 10 ഗോളുകള്‍ക്കാണ് ഇന്ത്യ കെട്ടുകെട്ടിച്ചത്. ഇന്ത്യക്കു വേണ്ട@ി മന്‍ദീപ് സിങ്, വരുണ്‍ കുമാര്‍ എന്നിവര്‍ ഇരട്ട ഗോള്‍ കണ്ടെത്തി. വിവേക് പ്രസാദ് , സുമിത് കുമാര്‍ , സുരേന്ദര്‍ കുമാര്‍ , സിമ്രന്‍ജീത്ത് സിങ് , നീല്‍കാന്ത ശര്‍മ , അമിത് രോഹിത്ദാസ് എന്നിവരാണ് ഇന്ത്യക്ക് വേണ്ടി ഗോള്‍ കണ്ടെത്തിയ മറ്റുതാരങ്ങള്‍. മൂന്നാം മത്സരത്തില്‍ കാനഡയെ തകര്‍ത്തപ്പോള്‍ തന്നെ ഇന്ത്യ ഫൈനലില്‍ പ്രവേശിച്ചിരുന്നു. ആദ്യ മത്സരത്തില്‍ ജപ്പാനേയും രണ്ടാം മത്സരത്തില്‍ മലേഷ്യയേയുമാണ് ഇന്ത്യ നേരിട്ടത്. എല്ലാ മത്സരങ്ങളിലും ഇന്ത്യക്ക് മികച്ച ജയം സ്വന്തമാക്കാനായി. ഇന്ന് നടക്കുന്ന ഫൈനലില്‍ ദക്ഷിണ കൊറിയയാണ് ഇന്ത്യയുടെ എതിരാളികള്‍. കഴിഞ്ഞ സീസണില്‍ അഞ്ചാംസ്ഥാനത്തേക്കു പിന്തള്ളപ്പെട്ട ഇന്ത്യ ഇത്തവണ ശക്തമായ തിരിച്ചുവരവാണ് നടത്തിയത്. പരുക്കിനെ തുടര്‍ന്നു പ്രമുഖ താരങ്ങളെ നഷ്ടമായിട്ടും എതിരാളികളെ നിലംപരിചാക്കി ഇന്ത്യ മുന്നേറുകയായിരുന്നു. ഇത്തവണ കിരീടം ചൂടാനായാല്‍ അതു ഇന്ത്യയെ സംബന്ധിച്ചിടത്തോളം അവിസ്മരണീയ നേട്ടമാകും. നാലു മത്സരങ്ങളില്‍ നിന്നായി ഒറ്റ ഗോള്‍മാത്രമാണ് വഴങ്ങിയിട്ടുള്ളത്. ക്യാപ്റ്റനും മലയാളിയും കൂടിയായ ശ്രീജേഷാണ് ഇന്ത്യയുടെ വലകാക്കുന്നത്. കിരീടം നേടാനായാല്‍ ഇന്ത്യന്‍ ടീമിന് അത് പുതു ജീവന്‍ നല്‍കും. ലോകകപ്പിന് ശേഷം നിറംമങ്ങിപ്പോയ ഇന്ത്യയുടെ തിരിച്ചുവരവ് കൂടിയാകും ഇത്.