വാഷിങ്ടണ്‍: കൊവിഡ് വ്യാപന പശ്ചാത്തലത്തില്‍ 2021ലെ ഓസ്‌കര്‍ പുരസ്‌കാര പ്രഖ്യാപന ചടങ്ങിലും മാറ്റം. ചടങ്ങ് രണ്ടുമാസത്തേക്കാണ് നീട്ടിവച്ചത്. ഇതുപ്രകാരം 2021 ഫെബ്രുവരി 28ന് നടക്കേണ്ട ചടങ്ങ് ഏപ്രില്‍ 25നാണ് നടക്കുക. മാര്‍ച്ച് മധ്യത്തില്‍ നോമിനേഷനുകള്‍ പ്രഖ്യാപിക്കും. ഇതിന്റെ ചുവടുപിടിച്ച് ബ്രിട്ടീഷ് അക്കാദമി ഫിലിം അവാര്‍ഡ് ചടങ്ങിന്റെ തീയതിയിലും മാറ്റംവരുത്തിയിട്ടുണ്ട്. 

കൊവിഡ് വ്യാപനം മൂലം നിരവധി സിനിമകളുടെ ചിത്രീകരണം മുടങ്ങിയിരുന്നു. ഈ വര്‍ഷം അവസാനത്തോടുകൂടി മാത്രമേ ഇവയുടെ ചിത്രീകരണം പൂര്‍ത്തിയാക്കാന്‍ സാധിക്കൂ. ഇത് പരിഗണിച്ചാണ് ഓസ്‌കര്‍ ചടങ്ങിന്റെ തീയതി മാറ്റിയതെന്നാണ് റിപോര്‍ട്ട്. ഇതിനു മുമ്പ് മൂന്നുതവണ മാത്രമാണ് ഓസ്‌കര്‍ പുരസ്‌കാരപ്രഖ്യാപന ചടങ്ങ് മുടങ്ങുകയോ തീയതി മാറ്റിവയ്ക്കുകയോ ചെയ്തിട്ടുള്ളത്. 1938ലെ പ്രളയം, 1968ല്‍ മാര്‍ട്ടിന്‍ ലൂഥര്‍ കിങ് ജൂനിയറിന്റെ മരണം, 1981ല്‍ അന്നത്തെ യു.എസ് പ്രസിഡന്റായിരുന്ന റൊണാള്‍ഡ് റീഗന്റെ മരണം എന്നിവയെത്തുടര്‍ന്നാണ് മുമ്പ് ഓസ്‌കര്‍ മാറ്റിവയ്ക്കപ്പെട്ടത്.