ബാഴ്‌സലോണ: ലാലിഗ കിരീടത്തിലേക്ക് കുതിക്കുന്ന ബാഴ്‌സലോണ ജയം തേടി ഇന്നിറങ്ങുന്നു. 28 മത്സരത്തില്‍ നിന്ന് 66 പോയിന്റുമായി ബഹുദൂരം മുന്നിലുള്ള ബാഴ്‌സലോണക്ക് പട്ടികയില്‍ 13-ാം സ്ഥാനത്തുള്ള എസ്പാന്യോളാണ് ഇന്ന് എതിരാളികള്‍. രാത്രി 8.45നാണ് മത്സരം. രണ്ടാം സ്ഥാനത്തുള്ള അത്‌ലറ്റിക്കോ മാഡ്രിഡുമായി ബാഴ്‌സലോണക്ക് പത്ത് പോയിന്റിന്റെ വ്യത്യാസമുണ്ട്. മൂന്നാം സ്ഥാനത്തുള്ള റയല്‍ മാഡ്രിഡുമായി 12 പോയിന്റിന്റെ വ്യത്യാസവുമുണ്ട്.
വൈകിട്ട് 5.30ന് നടക്കുന്ന മത്സരത്തില്‍ ഗെറ്റാഫേയും ലഗാനസും തമ്മില്‍ ഏറ്റുമുട്ടും. മറ്റൊരു മത്സരത്തില്‍ രാത്രി 11ന് സെല്‍റ്റാവിഗോയും വിയ്യാറയലും ഏറ്റുമുട്ടും. സൗഹൃദ മത്സരത്തിനിടെ പരുക്കേറ്റ ലയണല്‍ മെസ്സി ഇന്നത്തെ മത്സരത്തില്‍ കളത്തിലിറങ്ങും.

ആദ്യ മത്സരത്തില്‍ പരുക്കേറ്റത് കാരണം മൊറോക്കോക്കെതിരേയുള്ള രണ്ടാം സൗഹൃദ മത്സരത്തില്‍ മെസ്സി കളിച്ചിരുന്നില്ല.
റയല്‍ ബെറ്റിസുമായുള്ള മത്സരത്തിനിടെ പരുക്കേറ്റ ഉസ്മാന്‍ ഡംബലെയുടെ കാര്യത്തില്‍ തീരുമാനമൊന്നുമായിട്ടില്ല. പരുക്കില്‍നിന്ന് മുക്തനാകുന്ന ഡംബലെ ടീമിനൊപ്പം പരിശീലനത്തിന് ഇറങ്ങിയിട്ടുണ്ട്.
യുനൈറ്റഡും ഇന്നിറങ്ങുന്നു

ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ യുനൈറ്റഡ് ഇന്ന് ഇറങ്ങുന്നു. യുനൈറ്റഡുമായി മൂന്ന് വര്‍ഷത്തെ കരാറിലെത്തിയതിന് ശേഷം ഓലെയുടെ ആദ്യ മത്സരമാണ് ഇന്നത്തേത്. താത്ക്കാലിക പരിശീലകനായിരുന്നപ്പോള്‍ നടത്തിയ മികച്ച പ്രകടനമായിരുന്നു സ്ഥിരം പരിശീലകനാകാന്‍ സഹായിച്ചത്. 58 പോയിന്റുമായി പട്ടികയില്‍ അഞ്ചാം സ്ഥാനത്തുള്ള യുനൈറ്റഡ് ആദ്യ നാലില്‍ ഇടം പിടിക്കാനാണ് ശ്രമിക്കുന്നത്. നാലാം സ്ഥാനത്തുള്ള ആഴ്‌സനലിന് 60 പോയിന്റാണുള്ളത്.
അതേ സമയം കിരീടപ്പോരില്‍ ലിവര്‍പൂളുമായി പോരാടുന്ന മാഞ്ചസ്റ്റര്‍ സിറ്റിക്കും ഇന്ന് മത്സരമുണ്ട്. വൈകീട്ട് ആറിന് ഫുള്‍ഹാമിനേയാണ് സിറ്റി നേരിടുന്നത്. 30 മത്സരം കളിച്ച സിറ്റിക്ക് 74 പോയിന്റാണുള്ളത്. 31 മത്സരം കളിച്ച ലിവര്‍പൂള്‍ 76 പോയിന്റുമായി ഒന്നാം സ്ഥാനത്തും നില്‍ക്കുന്നു.

ഇന്നത്തെ മത്സരത്തില്‍ ജയിക്കാനായാല്‍ സിറ്റിക്ക് പട്ടികയില്‍ ഒന്നാം സ്ഥാനത്തെത്താനാകും. രാത്രി 8.30ന് നടക്കുന്ന മത്സരത്തില്‍ ക്രിസ്റ്റല്‍ പാലസും ഹഡേഴ്‌സ് ഫീല്‍ഡും തമ്മില്‍ ഏറ്റുമുട്ടും. മറ്റൊരു മത്സരത്തില്‍ ലെസ്റ്റര്‍ സിറ്റിയും ബേണ്‍മൗത്തും തമ്മിലാണ് മത്സരം.
ബേണ്‍ലിയും വോള്‍വ്‌സും തമ്മിലാണ് മറ്റൊരു മത്സരം. രാത്രി 11ന് നടക്കുന്ന മത്സരത്തില്‍ വെസ്റ്റ് ഹാമും എവര്‍ട്ടണും തമ്മില്‍ ഏറ്റുമുട്ടും. ബ്രിങ്ടണും സതാംപ്ടണും തമ്മിലാണ് മറ്റൊരു മത്സരം.