ലണ്ടന്‍: കൊവിഡ് കാരണം നിര്‍ത്തിവെച്ച ഇംഗ്ലീഷ് പ്രീമിയര്‍ ലീഗ് ഫുട്‌ബോള്‍ ചാംപ്യന്‍ഷിപ്പ് ഇന്ന് വീണ്ടും തുടങ്ങും. മൂന്ന് മാസത്തിന് ശേഷമാണ് പ്രീമിയര്‍ ലീഗ് മത്സരങ്ങള്‍ തുടങ്ങുന്നത്. ഇന്ന് രണ്ട് മത്സരങ്ങളാണ് ലീഗില്‍ ഉള്ളത്. രാത്രി പത്തിന് നടക്കുന്ന ആദ്യ മത്സരത്തില്‍ ആസ്റ്റണ്‍വില്ല ഷെഫീല്‍ഡ് യുനൈറ്റഡിനെ നേരിടും. രണ്ടാം മത്സരത്തില്‍ മാഞ്ചസ്റ്റര്‍ സിറ്റിയും ആഴ്‌സനലും തമ്മിലാണ് മത്സരം. സിറ്റിയുടെ പരിശീലകന്‍ പെപ് ഗ്വാര്‍ഡിയോളയും അദ്ദേഹത്തിന്റെ അസിസ്റ്റന്റ് ആയിരുന്ന അര്‍ട്ടേറ്റയും നേര്‍ക്കുനേര്‍ വരുന്ന പോരാട്ടം എന്ന പ്രത്യേകതയും ഈ മത്സരത്തിനുണ്ട്ണ്ട്. മാഞ്ചസ്റ്റര്‍ സിറ്റി ഇന്ന് ജയിക്കുകയാണെങ്കില്‍ ലിവര്‍പൂളിന്റെ കിരീട നേട്ടം വൈകും. ചാംപ്യന്‍സ്‌ലീഗ് യോഗ്യത സ്വന്തമാക്കണമെങ്കില്‍ ആഴ്‌സനലിന് ജയിച്ചേ തീരു എന്ന അവസ്ഥയാണ്. വെള്ളിയാഴ്ച ടോട്ടനവും മാഞ്ചസ്റ്റര്‍ യുനൈറ്റഡും തമ്മിലുള്ള ക്ലാസിക് പോരാട്ടവും നടക്കുന്നുണ്ട്. കിരീട പ്രതീക്ഷയുള്ള ലിവര്‍പൂളിന് ശനിയാഴ്ച എവര്‍ട്ടണുമായിട്ടാണ് മത്സരം. 

 

ലാലിഗയില്‍ സമനിലക്കളി

മാഡ്രിഡ്: ലാലിഗയില്‍ ഇന്നലെ നടന്ന മൂന്ന് മത്സരവും സമനിലയില്‍. റയല്‍ സോസിഡാഡും ഒസാസുനയും തമ്മിലുള്ള മത്സരം 1-1 എന്ന സ്‌കോറിനാണ് അവസാനിച്ചത്. മറ്റൊരു മത്സരത്തില്‍ ലെവന്റെയും സെവിയ്യയും ഓരോ ഗോള്‍ വീതം അടിച്ച് സമനില കണ്ടെത്തി. മറ്റൊരു മത്സരത്തില്‍ റയല്‍ ബെറ്റിസും ഗ്രാനഡയും രണ്ട് ഗോളുകള്‍ വീതം നേടി സമനില പാലിച്ചു. സമനില നേടിയതോടെ 29 മത്സരത്തില്‍ നിന്ന് സെവിയ്യക്ക് 51 പോയിന്റായി.