കോഴിക്കോട്: ജോലിക്കെന്ന വ്യാജേന കേരളത്തിലെത്തിച്ച് പീഡനത്തിനിരയാക്കിയ കേസില്‍ വെള്ളിമാട്കുന്ന് മഹിളാമന്ദിരത്തില്‍ കഴിയുന്ന മൂന്ന് ബംഗ്ലാദേശി പെണ്‍കുട്ടികളുടെ കാര്യത്തില്‍ മലപ്പുറം ജില്ലാ കലക്ടറും പൊലിസ് സൂപ്രണ്ടും മനുഷ്യാവകാശ കമ്മിഷന്‍ ആവശ്യപ്പെട്ട റിപ്പോര്‍ട്ട് നല്‍കിയില്ലെന്ന് കമ്മിഷന്‍ അംഗം പി.മോഹനദാസ് ആരോപിച്ചു.
കേസില്‍ മൊഴിനല്‍കാനെന്ന പേരില്‍ കുട്ടികളെ എട്ടു വര്‍ഷമായി തടഞ്ഞുവച്ചിരിക്കുന്നതിനെ സംബന്ധിച്ച് വിശദീകരണം നല്‍കണമെന്നാവശ്യപ്പെട്ട് ജൂണ്‍ 22ന് മനുഷ്യാവകാശ കമ്മിഷന്‍ കത്തുനല്‍കിയിരുന്നു. കുട്ടികള്‍ താമസിക്കുന്ന മഹിളാമന്ദിരത്തില്‍ സന്ദര്‍ശനം നടത്തിയ ശേഷമായിരുന്നു ഇത്. രണ്ടാഴ്ചയ്ക്കകം റിപ്പോര്‍ട്ട് നല്‍കാന്‍ ആവശ്യപ്പെട്ടെങ്കിലും ഇതുവരെ മറുപടിയൊന്നുമുണ്ടായിട്ടില്ലെന്ന് അദ്ദേഹം പറഞ്ഞു.
വിഡിയോ കോണ്‍ഫറന്‍സ് വഴി മൊഴിനല്‍കാന്‍ ഇവരെ ലഭ്യമാക്കുമെന്ന് ബംഗ്ലാദേശിലെ വിവിധ ജില്ലാ മജിസ്‌ട്രേറ്റുമാര്‍ ഉറപ്പ് നല്‍കിയ സാഹചര്യത്തില്‍ അവരെ ഇനിയും തടഞ്ഞുവയ്ക്കുന്നതില്‍ യാതൊരു ന്യായീകരണവുമില്ലെന്ന് കമ്മിഷന്‍ ചൂണ്ടിക്കാട്ടി.